ԱՄՆ սենատորները ներկայացրել են Ցեղասպանության ճանաչման և դատապարտման նոր բանաձև

Սենատոր Ռոբերտ Մենենդեսը` Նյու Ջերսիից, և ԱՄՆ նախագահի նախկին թեկնածու, տեխասցի սենատոր Թեդ Քրուզը Սենատում ներկայացրել են երկկուսակցական բանաձև, որի համաձայն` ճանաչվում և դատապարտվում է 1915 թվականի Հայոց ցեղասպանությունն Օսմանյան կայսրությունում։ Այս մասին տեղեկացնում է ԱՄՆ Հայ Դատի հանձնախումբը:

Վերոհիշյալ բանաձևին կողմ է եղել 14 սենատոր:

ԱՄՆ Հայ Դատի հանձնախմբի գործադիր տնօրեն Արամ Համբարյանը շնորհակալություն է հայտնել սենատորներին՝ նշելով, որ այդ բանաձևը վերջ կդնի Ցեղասպանության միտումնավոր ժխտմանը։

Սենատոր Ռոբերտ Մենենդեսի կարծիքով` Հայոց ցեղասպանությունը պատմական փաստ է, որը քննարկման ենթակա չէ։ Նա մասնավորապես նշել է. «Միայն Ցեղասպանության փաստի ճանաչումից հետո մենք կկարողանանք լիահույս լինել, որ ապագայում նման երևույթները կկանխվեն»:

Հիշեցնենք, որ ապրիլի 9-ին ԱՄՆ Ներկայացուցիչների պալատի անդամներ Ադամ Շիֆը և Գաս Բիլիրակիսը ներկայացրել էին Հայոց ցեղասպանության ճանաչման մասին նոր բանաձև: Բանաձևին կողմ էր քվեարկել 70 կոնգրեսական: Ըստ բանաձևի` Վաշինգտոնի քաղաքականության մեջ առաջարկվել է մտցնել մի շարք նոր դրույթներ, այդ թվում` այն միջոցները, որոնք ուղղված կլինեն Հայոց ցեղասպանության ճանաչման որոշակի քայլերի իրականացմանը։

Բանաձևի հեղինակները միևնույն ժամանակ կոչ են անում ԱՄՆ իշխանություններին` պաշտոնապես ճանաչել Հայոց ցեղասպանությունը, կասեցնել այս հանցագործությունը ժխտելու բոլոր փորձերը, ինչպես նաև գիտակցել Հայոց ցեղասպանության պատմության ուսումնասիրման անհրաժեշտությունը`ապագայում նման երևույթները կանխելու նպատակով: