Բրիտանիայի խորհրդարանը կրկին ձախողել է Brexit-ի այլընտրանքային տարբերակները

Մեծ Բրիտանիայի խորհրդարանը ևս մեկ անգամ ձախողել է Brexit-ի այլընտրանքային տարբերակներից որևէ մեկը հաստատելու քվեարկությունները, ինչից հետո երկրի վարչապետ Թերեզա Մեյը հանդես է եկել կառավարության գործունեությունը ժամանակավորապես դադարեցնելու կոչով: Այս մասին տեղեկացնում է The Guardian-ը:

Ապրիլի 1-ին Բրիտանիայի խորհրդարանում քվեարկության էին դրվել Brexit-ի երեք այլընտրանքային տարբերակներ, այդ թվում` ԵՄ-ի հետ ընդհանուր շուկայի կամ մաքսային միության ստեղծում ու ԵՄ կազմից դուրս գալու հարցով երկրորդ հանրաքվեի անցկացում:
Սակայն պահպանողական կուսակցության անդամները հրաժարվել են հավանություն տալ երեք տարբերակներից որևէ մեկին:

Նշվում է նաև, որ, ըստ ԵՄ առաջնորդների առաջադրած պայմանի, եթե խորհրդարանն առաջիկա օրերին որևէ որոշում չկայացնի, ապա Լոնդոնին ընդամենը 10 օր կմնա ԵՄ-ն առանց որևէ համաձայնագրի լքելու համար:

Brexit-ի հարցով բրիտանացի քարտուղար Սթիվ Բարքլեյն շեշտել է, որ Համայնքների պալատը մերժում է և՛ ԵՄ-ն առանց շահեկան համաձայնագրի լքելու, և՛ դրա կազմում մնալու առաջարկները: «Սակայն Մեծ Բրիտանիայի համար լավագույն տարբերակը համաձայնագրի կնքմամբ ԵՄ-ն լքելն է»,-  նշել է պաշտոնյան:

Հիշեցնենք, որ Եվրամիության առաջնորդները Մեծ Բրիտանիայի վարչապետին Brexit-ի հարցով երկու շաբաթ ժամանակ են տվել. Միացյալ Թագավորության Համայնքների պալատը մինչև ապրիլի 12-ը ժամանակ ունի ԵՄ կազմից պաշտոնապես դուրս գալու պայմանագիրը վավերացնելու համար: