Արցախում կգործի զբոսաշրջային մուտքի արտոնագրի համար պետական տուրքի գանձման նոր եղանակ

Այսօր՝ մարտի 27-ին կայացած Ազգային ժողովի լիագումար նիստում 24 կողմ ձայնով ընդունվել է «Պետական տուրքի մասին» ԼՂՀ օրենքում փոփոխություն կատարելու մասին նախագիծը:«Արցախպրես»-ի թղթակցի հաղորդմամբ՝ ներկայացնելով օրենքի նախագիծը՝ ԱՀ արտաքին գործերի նախարար Մասիս Մայիլյանն ասել է, որ փոփոխությունը վերաբերում է «Պետական տուրքի մասին» ԼՂՀ օրենքի 13-րդ հոդվածի 8-րդ կետի բ ենթակետին, որով նախատեսվում է պետական տուրք չգանձել մինչև 21 օր ժամկետով մեկանգամյա զբոսաշրջային մուտքի արտոնագրի համար:

«Նախատեսված օրենսդրական փոփոխությունը նպատակ ունի խթանել Արցախում, որպես հեռանկարային ճյուղ, զբոսաշրջության զարգացումը: Վարդենիս-Մարտակերտ մայրուղու բացումից հետո սահմանակետում ավելացել են զբոսաշրջիկները, և նրանց մի մասը ցանկանում է այցելել միայն Դադիվանք կամ Շահումյանի շրջանի տարբեր տեսարժան վայրեր: Նրանք պետք է ստիպված հասնեն Ստեփանակերտ՝ ԱՀ արտաքին գործերի նախարարությունում ձևակերպելու իրենց արտոնագրերը: Օրենքի ընդունումը կդյուրացնի զբոսաշրջիկների Արցախ այցելությունը և կնպաստի զբոսաշրջության զարգացմանը»,- մասնավորապես ասել է Մ. Մայիլյանը:

Գլխադասային հանձնաժողովի դրական եզրակացությունը ներկայացրել է ԱԺ ֆինանսաբյուջետային և կառավարման հարցերի մշտական հանձնաժողովի նախագահ, պատգամավոր Արամ Գրիգորյանը: