Հայ լրագրողի ուշագրավ հարցը` Զախարովային

ՌԴ ԱԳՆ պաշտոնական ներկայացուցիչ Մարիա Զախարովայի ավանդական ճեպազրույցի ժամանակ  հայ լրագրողներից մեկը դիտարկում է արել, որ շատ հակամարտություններ աշխարհում ներկայումս լուծվում են երկու հիմնական սկզբունքների հիման վրա` տարածքային ամբողջականության և ժողովուրդների ինքնորոշման իրավունքի,  ապա հետաքրքրվել է` ՌԴ արտաքին քաղաքականությունում այդ երկու սկզբունքներից ո՞րն է ավելի նախընտրելի` տարածքային ամբողջականությո՞ւնը, որի մասին պնդում է, օրինակ, Ուկրաինան, թե՞ ինքնորոշման իրավունքը, որով տեղի ունեցավ Ղրիմի միացումը:

Զախարովան ի պատասխան ասել է, որ դա նույնն է, ինչ մարդուն հարցնեն` կրակելիս ո՞ր կողմից կցանկանաք, որ փամփուշտն անցնի` գլխի ա՞ջ հատվածով, թե՞ ձախ:

«Կան բաներ, որոնք ուղղակի անբաժան են և կապված են իրար: Դրանք չի կարելի միմյանցից առանձին դիտարկել: Եվ, իմ կարծիքով, չի կարելի գլոբալ ընտրություն անել մեկի կամ մյուսի կողմը` առանց իրավիճակը հասկանալու և վերլուծելու»,- ասել է նա: