Եկատերինբուրգում այրվող տնից երեք երեխայի փրկած Գևորգ Ավետիսյանին ընտանիքին վտարել են տնից

Եկատերինբուրգի բնակիչ Գևորգ Ավետիսյանը, որը հունվարին այրվող տնից 3 երեխայի էր փրկել, РИА Новости-ին հայտնել է, որ իրեն ընտանիքի հետ վտարել են բնակարանից՝ պատճառաբանելով, թե նրանք այնտեղ բնակվելու իրավունք չունեն:

Քաղաքի շրջանային վարչությունից  հայտնել են, որ տարածքը, որտեղ բնակվելիս է եղել Ավետիսյանների ընտանիքը, մունիցիպալիտետի սեփականությունն է:

Գևորգը կնոջ` Տատյանայի և 5 երեխաների հետ բնակվել է Եկատերինբուրգի Լենինյան շրջանում գտնվող փայտե միհարկանի տնակում: Ավելի վաղ այն պատկանել է գործարանին, որտեղ աշխատել է Տատյանայի պապիկը, այնուհետև անցել է մունիցիպալիտետին:

РИА Новости-ն պարզել է, որ տունը Գևորգի կնոջ՝ Տատյանայի պապին է հանձնվել «Սվերդլեսմաշ» ձեռնարկության կողմից, որից հետո ընտանիքի անդամները հաստատվել են այնտեղ: 2016-ին դատարանը ճանաչել է Տատյանայի և նրա ժառանգների՝ տանը բնակվելու իրավունքը, սակայն «կացարանում բնակվելու օրինական հիմքերի բացակայության պատճառով» մերժել են ընտանիքի հետ սոցիալական վարձույթի պայմանագրի կնքումը:

2018-ին Եկատերինբուրգի շրջանային վարչությունը դիմել է դատարան ընտանիքին տանից վտարելու հայցով, դատարանը բավարարել է այն:

Գևորգը պատմել է գործակալությանը, որ կնոջ հետ  դիմում է ներկայացրել ընտանիքին կարիքավոր ճանաչելու վերաբերյալ, սակայն իշխանությունները մերժել են: