Դատարանը մերժեց Մանվել Գրիգորյանին գրավի դիմաց ազատ արձակելու միջնորդությունը

Շենգավիթի ընդհանուր իրավասության դատարանը չբավարարեց փաստաբանական խմբի միջնորդությունը՝ գրավով ազատ արձակել ԱԺ նախկին պատգամավոր, ԵԿՄ վարչության նախկին նախագահ Մանվել Գրիգորյանին։

Գրիգորյանի փաստաբանները միջնորդել էին դատարանին` 20 մլն դրամ գրավի դիմաց ազատ արձակել Մանվել Գրիգորյանին՝ փոխելով նրա խափանման միջոց կալանքը։

Փաստաբան Արսեն Մկրտչյանը լրագրողների հետ զրույցում ասաց, որ դատարանի որոշումը սպասելի էր իրենց համար։

Մանվել Գրիգորյանը «Նաիրի» բժշկական կենտրոնում է, որտեղ ստացիոնար բուժում է ստանում։

Հավելենք, որ Մանվել Գրիգորյանը դեկտեմբերի 21-ին Երևանի ընդհանուր իրավասության դատարանի որոշմամբ (դատավոր Դավիթ Բալայան) 25 միլիոն դրամ գրավի դիմաց ազատ էր արձակվել, սակայն գլխավոր դատախազությունը բողոքարկել էր այդ որոշումը։

2019 թվականի հունվարի 22-ին ՀՀ Վերաքննիչ քրեական դատարանը բավարարեց գլխավոր դատախազության ներկայացրած վերաքննիչ բողոքը, և Մանվել Գրիգորյանը կրկին կալանավորվեց։

Հիշեցնենք՝ Մանվել Գրիգորյանը մեղադրվում է ապօրինի կերպով ռազմամթերք ձեռք բերելու և պահելու, ինչպես նաև առանձնապես խոշոր չափերով գույք հափշտակելու մեջ։