Զարիֆի` հրաժարականի դիմում ներկայացնելը կարող է կապված լինել ազգային արժույթի արժեզրկման հետ. իրանագետ

Իրանի ԱԳ նախարար Մոհամմադ Ջավադ Զարիֆը, լինելով Հասան Ռոհանիի կառավարության ամենաառանցքային դեմքերից և իրանական հասարակության շրջանում ջերմ ընդունելության արժանացած քաղաքական կերպարներից, մեծ դեր է խաղացել 2015-ին «Համատեղ գործողությունների համապարփակ ծրագիր» (ՀԳՀԾ) համաձայնագրի ստորագրման հարցում։ Այս մասին Yerkir.am-ի հետ զրույցում ասաց իրանագետ Արտյոմ Տոնոյանը:

Նշված համաձայնագրից ԱՄՆ-ի դուրս գալուց անմիջապես հետո, ըստ մեր զրուցակցի, իրանական խորհրդարանում փակ քննարկումներից դուրս սպրդող և ԶԼՄ-ներին հասնող լուրերից հայտնի էր դառնում, որ խորհրդարանի` հատկապես պահպանողական թևի ներկայացուցիչների քննադատությունների թիրախում առաջին հերթին հենց Մոհամմադ Ջավադ Զարիֆն է:

«Կարելի է ենթադրել, որ Իրանի ԱԳՆ ղեկավարի հրաժարականը կարող է որոշակիորեն պայմանավորված լինել ԱՄՆ-ում տեղի ունեցած նախագահական ընտրություններից և Դոնալդ Թրամփի ընտրվելուց հետո ՀԳՀԾ համաձայնագրի ձախողմամբ, դրան հաջորդած պատժամիջոցների հետևանքով իրանական ազգային արժույթի արժեզրկմամբ և երկրում սկսված որոշակի տնտեսական դժվարություններով։ Հետաքրքիր է նաև այն, որ Զարիֆի` հրաժարականի դիմում ներկայացնելը համընկավ Սիրիայի նախագահ Բաշար Ասադի` Իրան կատարած այցի և Թեհրանում երկրի հոգևոր առաջնորդի հետ ունեցած հանդիպման հետ։ Դժվար է ուղիղ կապ տեսնել այս երկու իրադարձությունների միջև այս պահին, բայց երևույթն ինքնին բավական հետաքրքիր է»,- մեկնաբանեց Տոնոյանը:

Նշենք, որ Իրանի նախագահ Հասան Ռոհանին արտգործնախարարի հրաժարականի դիմումը դեռևս չի ստորագրել: