Իրաքը և Լիբանանը կարող են դառնալ աստանյան գործընթացի մասնակիցներ. Էրդողան

Իրաքը և Լիբանանը ՌԴ-ի, Թուրքիայի և Իրանի հետ մեկտեղ կարող են դառնալ սիրիական կարգավորման հարցով աստանյան գործընթացի մասնակիցներ: Այդ մասին ասել է Թուրքիայի նախագահ Ռեջեփ Թայիփ Էրդողանը. հայտնում է РИА Новости-ն:

«Աստնայան գործընթացը շարունակվում է` որպես ՄԱԿ-ի հովանու ներքո ձևավորված ժնևյան գործընթացին լրացնող: Մենք չենք դիտարկում Աստանան որպես Ժնևի այլընտրանք, թեև ժնևյան գործընթացը տապալվել է… Ես արդեն ասել եմ, որ մենք կարող ենք ներառել  մեր բանակցություններում նաև Իրաքը և Լիբանանը, քանի որ այդ երկրներն ընդհանուր սահմաններ ունեն Սիրիայի հետ և տարբեր տեսանկյուններից կապված են երկրի հետ»,- ասել է Էրդողանը լրագրողներին օդանավում Սոչիից վերադարձի ճանապարհին:

Հիշեցնենք, որ փետրվարի 14-ին Սոչիում կայացել է ՌԴ, Թուրքիայի և Իրանի նախագահների` Սիրիայի հարցով հանդիպումը: