Մոսկվան և Թբիլիսին ավարտել են ՀՀ-ի համար մեծ նշանակություն ունեցող միջանցքի շուրջ բանակցությունները. Коммерсантъ

Մոսկվան ու Թբիլիսին ավարտել են «Ապրանքների առևտրի մաքսային վարչարարության և մոնիթորինգի մեխանիզմների մասին» համաձայնագրի դրույթներն իրականացնելու համար անհրաժեշտ ընթացակարգերի քննարկումը: Այդ մասին հայտնում է Коммерсантъ-ը` իր աղբյուրին հղումով:

Համաձայնագիրը ստորագրվել է 2011-ին Ժնևում. դա այն փաստաթղթերի փաթեթի մի մասն է, որով Ռուսաստանն անդամակցել է Առևտրի համաշխարհային կազմակերպությանը:

Ռուսաստանն ԱՀԿ-ին անդամակցել է 2012-ին, սակայն Վրաստանի հետ համաձայնագիրը, որը ենթադրում է երկու երկրների միջև առևտրային 3 միջանցքի ձևավորում, որոնցից երկուսն անցնելու են Աբխազիայով և Հարավային Օսիայով, այդպես էլ չի աշխատել: Մոսկվայից և Թբիլիսիից 7 տարի է պահանջվել այն իրականացնելու համար:

Վրաստանի վարչապետի` Ռուսաստանի հետ հարաբերությունների հարցերով հատուկ ներկայացուցիչ Զուրաբ Աբաշիձեն հաստատել է թերթի հետ զրույցում, որ համաձայնագրի ամբողջականացումն ավարտված է:

Թերթը նշում է, որ համաձայնագրի իրականացմամբ հետաքրքրված է նաև Հայաստանը, որի համար հարավօսական միջանցքն այլնտրանք է Ռազմական-վրացական ճանապարհին, որը ձմռանը հաճախ արգելափակվում է: