Արտահանման ծավալները նվազել են, քանի որ Թեղուտը լեռնահանքային ոլորտում դադարեց գործել. Տիգրան Խաչատրյան

Արտահանման ծավալները նվազել են, քանի որ Թեղուտը լեռնահանքային ոլորտում դադարեց գործել. կառավարության նիստից հետո լրագրողների հետ զրույցում ասաց տնտեսական զարգացման և ներդրումների նախարար Տիգրան Խաչատրյանը:

«Սկսած փետրվար ամսից` Թեղուտ կազմակերպությունը դադարեց գործել, իսկ այն արտահանման կառուցվածքում զգալի ազդեցություն ուներ: Այդ բացակայող կտորը տնտեսության մեջ իր ազդեցությունը թողնում է»,- նշեց նա:

Ինչ վերաբերում է հարցին` հնարավո՞ր է Թեղուտի վերագործարկում, նախարարը պատասխանեց. «Բանկի հետ ունեն կազմակերպական հարցեր, որոնք պետք է օրենքով սահմանված կարգով հասնեն ավարտին: Որևէ բան չի խանգարում, որ հարաբերությունները պարզելուց հետո անցնեն վերականգնողական աշխատանքների»:

Իսկ թե ինչքա՞ն է պատճառված վնասը, Խաչատրյանն ասաց, որ դա հեշտ է հաշվարկել: «2017 թվականին արտադրել և արտահանել են մոտավորապես 120 մլն դոլարի արտադրանք: Այդ չափով այս տարվա արտահանման կառուցվածքում պակաս է, դա այն 10-15 տոկոսն է, որ բացակայում է»,- նշեց նա: