Երկարաժամկետ խաղաղության հաստատումից կշահեն բոլոր կողմերը․ ԵՄ-ն՝ Արցախյան հիմախնդրի խաղաղ կարգավորման մասին

ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի, ինչպես նաև երկու երկրների արտգործնախարարների միջև  Եվրոպայի անվտանգության և համագործակցության կազմակերպության Մինսկի խմբի համանախագահների հովանու ներքո տեղի ունեցած հանդիպումները դրական ազդակ են հաղորդում Ղարաբաղյան հակամարտության խաղաղ կարգավորմանը. հայտարարություն է տարածել Եվրամիության դիվանագիտության ղեկավարի խոսնակ Մայա Կոսյանչիչը։

Հայտարարության մեջ մասնավորապես ասվում է. «Եվրամիությունն անհամբերությամբ սպասում է բանակցությունների արդյունքներին՝ ներառյալ երկրների արտգործնախարարների՝ ժողովուրդներին խաղաղության նախապատրաստելու համար կոնկրետ միջոցներ ձեռնարկելու անհրաժեշտության մասին վերջերս ձեռք բերված համաձայնության ամբողջական իրականացմանը, ինչպես նաև բանակցություններին նոր լիցք հաղորդելուն ուղղված քայլերին։

ԵՄ-ն շարունակում է լիովին աջակցել ԵԱՀԿ Մինսկի խմբի համանախագահների, ինչպես նաև քաղաքացիական հասարակության շրջանում վստահության ամրապնդմանն ուղղված ջանքերին»:

Հայտարարության մեջ նշվել է նաև, որ երկարաժամկետ խաղաղության հաստատումից կշահեն բոլոր կողմերը, ինչը կօգնի Հարավային Կովկասի տարածաշրջանին գործի դնել իր ամբողջ ներուժը: