Արդարադատության նախարարի պաշտոնակատարն ամփոփեց իր գործունեությունը

Այսօր լրագրողների հետ հանդիպման ժամանակ արդարադատության նախարարի պաշտոնակատար Արտակ Զեյնալյանը ամփոփել է 2018թ մայիսից նոյեմբերն ընկած ժամանակահատվածը: Նա նշել է, որ պետական բյուջեից հատկացվել է 270 միլիոն դրամ ՔԿՀ-ներում կապիտալ վերանորոգում իրականացնելու համար: Մցույթները անց են կացվել, և այդ 270 միլիոն դրամից խնայվել է 100 միլիոն դրամ, որը կվերադարձվի բյուջե: Երևանի երեք և Վանաձորի, Գորիսի բժշկական հաստատություններում նախատեսվում է հիմնել բաժանմունքներ, որտեղ կկարողանան իրենց բուժումը ստանալ դատապարտյալ և ազատազրկված  անձինք:

Դեկտեմբերի 17-ի դրությամբ իրականացվել է քրեական համաներում ավելի քան 550 դատապարտյալի նկատմամբ:  

Հարցին, թե արդյոք նա հանդիպել է «Հոկտեմբերի 27-ի» գործով  զինված խմբի  պարագլուխ,  ցմահ ազատազրկման դատապարտված  Նաիրի Հունանյանին, նախարարի պաշտոնակատարը նշել է, որ հանդիպել է նրան, առանձնազրույց ունեցել: Խոսվել է նաև նրա պահման պայմանների վերաբերյալ:

«Խորհուրդ եմ տվել նրան զբաղվել սպորտով, որովհետև գիրացել էր»,- ասել է նախարարի պաշտոնակատարը:

 Ինչ վերաբերում է Արտակ Զեյնալյանի հետագա պաշտոնավարման հետ կապված հարցին, վերջինս նշել է, որ առաջիկայում այդ հարցը բոլորին պարզ կլինի:

«Արդարադատության նախարար կամ կառավարության անդամի պաշտոնը քաղաքական պաշտոն է, և դա մեծապես պայմանավորված է մեծամասնություն ունեցող քաղաքական ուժի և վարչապետի հայեցողությամբ: Առաջիկայում դա միանգամայն պարզ կդառնա բոլորի համար»,- եզրափակել է նա: