«Հայաստան» համահայկական հիմնադրամի մարաթոնի ընթացքում հավաքված գումարի չափը կազմել է 14 115 940 դոլար

«Հայաստան» համահայկական հիմնադրամի մարաթոնի ընթացքում հավաքված գումարի չափը կազմել է 14 115 940 դոլար: Այս մասին լրագրողներին հայտնեց  հիմնադրամի տնօրեն Հայկակ Արշամյանը:

Նրա խոսքով` հեռուստամարաթոնից հետո գումարն աճել է` ի տարբերություն նախորդ տարվա, երբ 12 մլն դոլարի մասին էր խոսք գնում, սակայն իրականում մուտք էր եղել միայն 7 մլն դոլար գումար:

«Հոկտեմբերի սկզբին, երբ աշխատանքի անցա հիմնադրամում,  հիմնադրամի նկատմամբ վստահության մեծ խնդիր կար թե' Հայաստանում, թե' արտասահմանում: Նույն ամսին այցելեցի Կանադա և ԱՄՆ, հանդիպեցի դոնոր կազմակերպությունների և անհատների հետ: Խորը հիասթափություն կար հիմնադրամի նկատմամբ, քանի որ կարծում էին, որ իրենց գումարները մսխվել են: Փորձեցինք որքան հնարավոր է վերականգնել վստահությունը»,- ասաց Արշամյանը:

Նրա խոսքով` հիմնադրամը UNICEF-ի հետ համատեղ դրամահավաք է իրականացրել 2 օր առաջ, որի արդյունքում 245 000 դոլար է հավաքվել: Արշամյանը տեղեկացրեց, որ այդ դրամահավաքը կազմակերպված է եղել Երկրաշարժի 30-ամյա տարելիցի կապակցությամբ, և գումարի հիմնական մասն ուղղվելու է Գյումրիում և  Սպիտակում բնակարանաշինությանը:

Հիմնադրամի տնօրենի հավաստմամբ` մեծացել է նվիրատվությունների թիվը. եթե 2017-ին եղել է մոտ 3240 նվիրատվություն, ապա այս տարի միայն Հայաստանում դրանց թիվը հասել է 3623-ի: «Մեծացել է նաև SMS փոխանցումների թիվը` եթե նախորդ տարի ստացել էինք 305 SMS, ապա այս տարի` 1465: Բացի այդ` պետական հաստատությունները, բանկերը նույնպես մեծ ներդրում են արել»,- հայտնեց նա:

Արշամյանի խոսքով`  Հայաստանից ունեցել են 901 653 դոլարի նվիրատվություն, Արցախից՝ 700 000 դոլարի, ԱՄՆ-ից՝ 5 մլն 500 000-ի, Ֆրանսիայից,  Հունաստանից, Գերմանիայից և Շվեյցարիայից՝ 1 մլն 510 000-ի, Բրազիլիայից՝ 50 000 մլն դոլարի: Նա նշեց նաև, որ այս տարի Իրանից է մեծ նվիրատվություն ստացվել` 1 մլն 505 000 դոլարի չափով: