ՀԱԷԿ–ում հայտնաբերված չարաշահումների մասով ձերբակալվածներ չկան. Գարեգին Բաղրամյան

«Հայկական ատոմային էլեկտրակայան» ՓԲ ընկերությանում հայտնաբերված չարաշահումների մասով ձերբակալվածներ չկան։ Այս մասին  կառավարության նիստից հետո լրագրողների հետ զրույցում ասաց Էներգետիկ ենթակառուցվածքների և բնական պաշարների նախարարի պաշտոնակատար Գարեգին Բաղրամյանը։

«Ստուգումները ինչպես ԲԷՑ–ում, այնպես էլ ՀԱԷԿ–ում ու մյուս պետական ընկերություններում շարունակական են լինելու»,- նշեց նա՝ հավելելով, որ  ՀԱԷԿ–ում ուսումնասիրությունները շարունակվում են, վերլուծության արդյունքում համապատասխան մարմինները կներկայացնեն համապատասխան տվյալները։

Բաղրամյանը նաև հայտնեց, որ հրապարակված չարաշահումը վերաբերում է ընթացիկ նորոգման աշխատանքներին. բացի այն բանից, որ կայանի ժամկետը երկարաձգվում է,  ամեն տարի խոշոր նորոգում է իրականացվում է, երբ կանգնում է լիցքավորման։

Հիշեցնենք, որ Հայաստանի Հանրապետության ազգային անվտանգության ծառայությունը տնտեսական և կոռուպցիոն բնույթի հանցագործությունների դեմ պայքարին ուղղված իր գործառույթների իրականացման շրջանակներում ձեռնարկված օպերատիվ-հետախուզական միջոցառումների և քննչական համալիր գործողությունների արդյունքում բացահայտել և կանխել էր առերևույթ հանցագործության հատկանիշներ պարունակող նոր դեպքեր:

Մասնավորապես՝ ձեռք բերված նախնական տվյալների համաձայն` ՀՀ «Հայկական ատոմային էլեկտրակայան» ՓԲ ընկերության համապատասխան պաշտոնյաների հետ սերտ կապերի մեջ գտնվող անձինք, իրենց կողմից տնօրինվող ընկերությունների միջև վերավաճառքի ձևական գործարքներ ձևակերպելով և ապրանքների իրական գներն այդկերպ ուռճացնելով, ատոմակայանի առաջին դասի անվտանգության սարքավորում համարվող ընդամենը շուրջ 7 մլն ՀՀ դրամ արժեքով պահեստամասերը ՀԱԷԿ-ին 2017-2018 թվականների ընթացքում վաճառել են 33 մլն ՀՀ դրամ գումարով` այդպիսով վատնելով շուրջ 25 մլն ՀՀ դրամ: