Հետհեղափոխական շրջանում պետական բյուջեն չպետք է լիներ իներցիոն. Միքայել Մելքումյան

Ազգային ժողովի արտահերթ նիստում ընթանում է 2019-ի բյուջեի քննարկումը: «Ծառուկյան» դաշինքից ԱԺ փոխնախագահ Միքայել Մելքումյանը նշեց, որ իրենք կողմ են քվեարկելու բյուջեի նախագծին, սակայն ունեն մի շարք դիտարկումներ:

Նրա խոսքով` հետհեղափոխական շրջանում պետական բյուջեն չպետք է լիներ իներցիոն, այլ պետք է արտահայտեր հետհեղափոխական շրջանի սպասումները, որոնք ունի ոչ միայն ժողովուրդը, այլև բիզնես միջավայրը: «Երբ մենք ասել ենք` բարձրացնել աշխատավարձ կամ թոշակ, մեր գործընկերները միշտ ասել են` տեղը ցույց տվեք, մենք դա կանենք: Որպեսզի այս սինդրոմը հաղթահարենք, մեզ պետք է, որ ֆորմուլան հստակ ձևակերպենք»,- ասաց Մելքումյանը:

Ըստ նրա` տնտեսական-սոցիալական քաղաքականությունը պետք է ունենա գաղափարախոսություն և ծրագրեր, որոնցով էլ պետք է առաջ գնալ: «Մենք չենք կարող օրվա կեսը լինել սոցիալիստական, մյուս կեսը` աջ լիբերալ, իսկ երրորդ կեսը` ցենտրիստական»,- ասաց Մելքումյանը: