Տարոն Մարգարյանի ատենախոսության պաշտպանությունից հայտնի Սևակ Խաչատրյանն ազատման դիմում է գրել

2013-ի դեկտեմբերին Երևանի նախկին քաղաքապետ Տարոն Մարգարյանի ատենախոսության պաշտպանության ժամանակ լրագրողների նկատմամբ ցուցաբերած վատ վարքով հանրությանը հայտնի «Սաքուլիկենց թիմից» Սևակ Խաչատրյանն աշխատանքից ազատման դիմում է գրել: «Պռոստը չեմ ուզում ձեր մակարդակին իջնեմ… Մեղք եք… մաղձ կա»,- այդ օրը լրագրողներին ասել էր նա` բարիկադներ սարքելով ու թույլ չտալով ներկա լինել Տարոն Մարգարյանի ատենախոսության պաշտպանությանը:

Խաչատրյանն արագ պարգևատրվել էր. 2014-ի արդեն իսկ «բարի համբավ» ունեցող ուսխորհրդի նախագահ Սևակ Խաչատրյանին նշանակեցին պրոռեկտոր: 

2015-ի սեպտեմբերի 19-ին պաշտպանության նախարար Սեյրան Օհանյանը ՀՊՏՀ-ում ուսանողների հետ հանդիպման ժամանակ Սևակ Խաչատրյանին պարգևատրվեց «Վազգեն Սարգսյան» մեդալով:

ՀՀ ԿԳ նախկին նախարար Արմեն Աշոտյանը, անդրադառնալով Սևակ Խաչատրյանի` բուհի պրոռեկտոր նշանակվելուն, նշել էր, թե` բա ի՞նչ անենք, հո ամբողջ կյանքում տղան առանց աշխատանքի չէ՞ր մնալու: 

Սևակ Խաչատրյանը ֆեյսբուքյան իր էջում գրել է. «Թե ինչ է տվել ինձ ժողը, ինչ անմոռանալի օրեր եմ ապրել, ինչ ընկերներ եմ ձեռք բերել, պարզապես հնարավոր չէ նկարագրել...Ժողն ինձ տվել է ամենակարևորը. ժողում սիրահարվել ու ընտանիք եմ կազմել: Ես ժողում գիտելիք եմ ստացել, կայացել եմ, սովորել եմ ճիշտը զանազանել ստից»: