ԱՄՆ պատժամիջոցները մարդկության դեմ հանցագործություն են. Զարիֆն արձագանքել է Պոմպեոյի հայտարարությանը

Իրանի ԱԳ նախարար Մոհամմադ Ջավադ Զարիֆն արձագանքել է երեկ ԱՄՆ պետքարտուղար Մայք Պոմպեոյի՝ BBC-ի պարսկերեն ծառայությանը տված հարցազրույցին, որի ընթացքում ամերիկացի դիվանագետը հայտարարել էր, որ Իրանի ժողովրդին ԱՄՆ սահմանած պատժամիջոցների պատճառած դժվարությունները վերացնելու համար անհրաժեշտ է, որ Իրանի իշխանությունները փոխեն իրենց վարքագիծը:

«Պետքարտուղար Պոմպեոն Իրանին է մեղադրում ԱՄՆ անօրինական պատժամիջոցների համար, որոնք արգելափակում են իրանցիների ձեռնահասությունը սննդամթերք եւ դեղամիջոցներ ձեռք բերելու համար անհրաժեշտ ֆինանսական ծառայություններին: Բնականաբար, ի հեճուկս ԱՄՆ գործադրած ջանքերի, մենք կապահովենք մեր ժողովրդի համար անհրաժեշտ սննդամթերքն ու դեղամիջոցները: Այդուհանդերձ, ԱՄՆ-ը պատասխանատու է Իրանի եւ Եմենի նկատմամբ իրականացվող՝ մարդկության դեմ հանցագործությունների համար»,- Twitter-ի իր միկրոբլոգում գրել է Զարիֆը: