ԱԱԾ տնօրենի ու ՀՔԾ պետի ձայնագրության գործով ՔԿ-ն Քոչարյանին տուժող չի ճանաչել. փաստաբան

ՀՀ ԱԱԾ և ՀՔԾ ղեկավարների հեռախոսային խոսակցության ձայնագրության հրապարակման վերաբերյալ Քննչական կոմիտեում քննվող գործի շրջանակներում ՀՀ երկրորդ նախագահ Ռոբերտ Քոչարյանին տուժողի դատավարական կարգավիճակ տալու վերաբերյալ միջնորդությունը Քննչական կոմիտեն մերժել է: Այս մասին Yerkir.am-ի հետ զրույցում ասաց Ռոբերտ Քոչարյանի փաստաբան Հովհաննես Խուդոյանը:

Միջնորդությունը ներկայացվել էր՝ հաշվի առնելով այն հանգամանքը, որ ձայնագրության բովանդակությունը պարունակում է այնպիսի տվյալներ, որոնք հաստատում են Քոչարյանի ազատությունն ապօրինի սահմանափակելուն ուղղված գործողությունների կատարման փաստը:

Փաստաբանի խոսքով՝  ՔԿ-ն միջնորդությունը մերժել է՝ պատճառաբանելով, որ, չնայած ՔԿ-ի՝ նախաքննության ընթացքում ձեռնարկած քննչական և դատավարական գործողություններին, դատարանի գործունեությանը միջամտելու վերաբերյալ տվյալներ ձեռք չեն բերվել: «Սակայն սա ճիշտ հիմնավորում չէ: Պատրաստվում ենք այդ միջնորդությունը մերժելու մասին ՔԿ-ի որոշումը բողոքարկել ՀՀ գլխավոր դատախազին»,- ասաց Խուդոյանը: