Ուզում էին իմ բերանից մի խոսք լսել. Վանեցյանը՝ Հովիկ Աբրահամյանին պատկանող տարածքի զենքերի մասին

Այդ օրերին ինձ տարբեր հարցեր էին տալիս՝ ցանկանալով իմ բերանից լսել մի խոսք, որով պետք է մեղադրեի ինչ-որ մեկին, սակայն ես որևէ հայտարարություն չեմ արել. լրագրողների հետ զրույցում նման միտք արտահայտեց ԱԱԾ պետ Արթուր Վանեցյանը` խոսելով ՀՀ նախկին վարչապետ Հովիկ Աբրահամյանին պատկանող տարածքներում հայտնաբերված զենքերի և Մարտի 1-ին դրանց առնչությանը:

Վանեցյանի խոսքով՝ այդ օրերին տվյալներ էին ստացվել, որ Հովիկ Աբրահամյանին պատկանող տարածքում կա մեծ քանակությամբ զենք, որը հնարավոր է առնչություն ունի Մարտի 1-ի դեպքերի հետ: «Ես էլ ասել եմ, որ կա վարկած՝ հնարավոր է օգտագործվել են այդ զենքերը, ինչը պարզելու համար իրականացվում է փորձաքննություն, որի արդյունքներից հետո կպարզվի իրականությունը: Եղել է փորձաքննություն և հայտարարվել է, որ որևէ կապ չունեն զենքերը Մարտի 1-ի գործի հետ: Կարևոր եմ համարում, որ օբյեկտիվ քննություն է իրականացվում, և չենք փորձում երբևէ ազդել փորձաքննություն իրականացնող մարմնի վրա, որպեսզի մեզ կամ հանրությանը ցանկալի ինֆորմացիա տան»,- ասաց ԱԱԾ տնօրենը: