Կարելի՞ է բերանից մի կտոր միս հանել ու ասել, որ սա ռակ է. կենդանաբանական այգու աշխատակիցները`օրերս անկած վագրի մասին

Ավելի վաղ տեղեկացրել էինք, որ այսօր կենդանաբանական այգու նախկին աշխատակիցները բողոքի ակցիա են իրականացրել`պահանջելով այգու տնօրենի հրաժարականը:

Բողոքի ակցիայի մասնակիցները ակցիայի ընթացքում անդրադարձան օրեր առաջ այգու վագրերից մեկի անկմանը: «Եկել են մասնագետներ երկու տարբեր երկրներից. առաջինը եղել է Մոսկվայի գլխավոր բժիշկը, որը հայտարարել է, որ երկու էգ վագրերը հրաշալի վիճակում են: Դրանից հետո գալիս են Լոնդոնից` ինչ-որ անհայտ ծագում ունեցող մասնագետներ. մենք չգիտենք` իրենք ովքեր են, դա ստուգելն անհնար է,: Նրանք ինչ ուզեն, կարող են հայտարարել. պարզվեց, որ երկրորդ վագրի բերանում էլ կա նորագոյացություն՝ չարորակ բնույթի: Հիմա ձեզ եմ հարց տալիս, կարելի՞ է բերանի միջից մի կտոր միս հանել ու ասել, որ սա ռակ է: Ինչքանո՞վ է դա լուրջ: Ամբողջ բերանը կտրտել են, ատամներն են հեռացրել, վերջում էլ հայտարարել են, որ նա ռակ ա, պետք է քնեցնել, որովհետև տանջվում է»,- նշեց ակցիայի մասնակիցներից մեկը:

Բողոքի ակցաիյի մասնակիցները նաև շեշտում են, որ կԿենդանաբանական այգու տնօրենը՝ Ռուբեն Խաչատրյանը, ուղիղ եթերում մանուկներին է ցուցադրել վագրի վիրահատությունը: «Ասում է՝ սա Զատկի մեծ նվեր կլինի մեր երեխաներին: Փսիխիչեսկի նորմալ մարդու մասին եք խոսո՞ւմ»,- բարկացած նշեց նրանցից մեկը:

Նրանք վստահեցնում են նաև, որ ողջ-ողջ թաղվել են այգու 3 առյուծները, խնդիրներ կան ինչպես ձիարշավարանում, այնպես էլ այգու արջերի մոտ:

Այգու տնօրենն, ի պատասխան իր հասցեին հնչող մեղադրանքներին, ընդգծեց, որ մասնակիցների թվում կան մարդիկ, որոնք երբեք կապ չեն ունեցել կենդանաբանական այգու հետ: «Դրանք կենդանիների առևտրով զբաղվողներ են, ռեստորաններում կենդանիներ ցուցադրողներ են, մարդիկ, որոնք միտում ունեն տարբեր էկզոտարիումներ բացել կամ արդեն ունեն էկզոտարիումներ: Մարդիկ են, որոնք դեմ են այսօրվա քաղաքականությանը, որն այսօր որդեգրել է Երևանի կենդանաբանական այգին՝ կենդանիների առևտուրը կանոնակարգել շատ խիստ օրենքով: Փորձելու ենք ամեն ինչ անել, որպեսզի այդ ձևաչափը հնարավորինս մոտ լինի եվրոպական ձևաչափին»,- ասաց նա: