Երևանում մեքենան բախվել է գազատար խողովակին. հրդեհ է բռնկվել

Հուլիսի 8-ին, ժամը 10:39-ին «911» ծառայությանն ահազանգ է ստացվել, որ Երևան քաղաքի Շերամի փողոցի թիվ 77 շենքի մոտակայքում տեղի է ունեցել ՃՏՊ՝ ավտոմեքենան բախվել է գազատար խողովակին, առկա է գազի արտահոսք` հրդեհի բռնկմամբ:

Դեպքի վայր է մեկնել ՀՀ ԱԻՆ ՓԾ հրշեջ-փրկարարական ջոկատից երկու մարտական հաշվարկ, մեկ ջրատար և Աղետների բժշկության կենտրոնի հերթապահ բժիշկը:

Պարզվել է, որ «Mercedes C240» մակնիշի ավտոմեքենան (վարորդը` Մ. Ս., 1980 թ.) դուրս է եկել երթևեկելի գոտուց և բախվել գազատար խողովակին, ինչի հետևանքով տեղի է ունեցել արտահոսք` հրդեհի բռնկմամբ. այրվում է արտահոսած գազը, ավտոմեքենան և խոտածածկույթ (տուժածներ չկան):

Գազի վթարային ծառայության աշխատակիցները դադարեցրել են գազամատակարարումը:

Փրկարարներն իրականացրել են հովացման աշխատանքներ` մինչ գազատար խողովակում եղած գազի ավարտվելը:

Հրդեհը մեկուսացվել է ժամը 12:36-ին, մարվել՝ 12:47-ին: Այրվել է գազատար խողովակից արտահոսած գազը, ավտոմեքենան` ամբողջությամբ և խոտածածկույթ (մոտ 500 քմ):