Գագիկ Ծառուկյանը շատ մեծ արժեք ունի Հայաստանի պատմության մեջ. Արմավիրի նորանշանակ մարզպետ

Կառավարության նիստից հետո լրագրողները Արմավիրի նորանշանակ մարզպետ Գագիկ Միրիջանյանին հարց ուղղեցին` արդյո՞ք իր մասնագիտական որակները կօգնեն իր գործունեությանը: Մարզպետի խոսքով` եթե նկատի ունեն իր մասնագիտությունը` բուժական գործը, հանրային առողջության կազմակերպումը, ապա ինքն ունի հանրության հետ աշխատելու որոշակի փորձ:

«Իմ մասնագիտության մեջ բուժելուց առաջ կարևոր է կանխարգելումը: Մենք մարզում էլ առաջին կանխարգելիչ միջոցառումները կանցկացնենք»,- ասաց նա:

Հարցին, թե ինչպե՞ս է դիմակայելու մարզի «ֆեոդալների» ազդեցությանը, մարզպետը պատասխանեց, որ այս պահին որևէ խոչընդոտ չի տեսնում, խոչընդոտներ լինելու դեպքում դրանք կհարթվեն: Նա խոստովանեց, որ իր պորտֆելը ԲՀԿ-ի կողմից է եղել, պաշտոնավարելու առաջարկությունը ԲՀԿ-ից է ստացել: Այն, որ ինքը Գագիկ Ծառուկյանի ընկերոջ տղան է, դա էլ խոստովանեց: «Գագիկ Ծառուկյանն իր կյանքի ընթացքում շատ մեծ արժեք ունի Հայաստանի պատմության մեջ»,- ասաց Միրիջանյանը: