Աթամբաևի կարծիքով` իր կողմնակիցների ձերբակալությունները քաղաքական շարժառիթ ունեն

Ղրղզստանում մի շարք աղմկահարույց ձերբակալություններից հետո երկրի նախկին նախագահ Ալմազբեկ Աթամբաևը հանդես է եկել քաղաքական հայտարարությամբ. հայտնում է Независимая газета-ն: Նա իր աջակիցների ձերբակալությունները  «քաղաքական շարժառիթ ունեցող ու անհիմն» է որակել:

«Ղրղզստանի նախկին վարչապետին` Սափար Իսակովին, և Պետական մաքսային ծառայության նախկին նախագահ, մեր կուսակցության քաղաքական խորհրդի անդամ Կուբանըչբեկ Կուլմատովին ձերբակալելու որոշումը կոռուպցիայի դեմ պայքար չէ»,- նշել է նա:

Ըստ Աթամբաևի` նրանք հենց այն մարդիկ են, ովքեր աչքի են ընկել կոռուպցիայի դեմ պայքարում: «Սափար Իսակովի կառավարությունն այս տարվա չորս ամիսների ընթացքում ապահովել է  բյուջեի` 5 միլիարդ սոմի պրոֆիցիտը»,- ասել է նախկին նախագահը:

Ըստ նրա` նման ցուցանիշի երկրի անկախության ընթացքում հաջողվել է հասնել առաջին անգամ:

Աթամբաևը կարծում է, որ կոռուպցիայի դեմ պայքարի մասին աղաղակների անվան տակ փաստացիորեն «վհուկների որս» է սկսվել նրանց նկատմամբ, ովքեր ունեն իրենց կարծիքը, իրենց դիրքորոշումը: