Հայերը Դիարբեքիրի ոչ թե հյուրերն են, այլ բնիկները. Թուրքիայում նախագահի թեկնածուի ուշագրավ հայտարարությունները

Թուրքիայում քրդամետ Ժողովուրդների դեմոկրատական կուսակցության նախկին համանախագահ Սելահաթթին Դեմիրթաշը, ով այժմ բանտում է, հարցազրույց է տվել Պոլսում լույս տեսնող հայկական «Ակօս» թերթին։

Դեմիրթաշը անդրադարձել է ներկայիս Թուրքիայի տարածքում գտնվող հայկական Տիգրանակերտ նահանգին`  Դիարբեքիրին, քաղաքում հայերի պատմությանը, ինչպես նաև  հայ պատգամավոր Կարո Փայլանին, ով պատգամավորական ընտրություններին առաջադրվել է այդ նահանգից:

«Կարոն` Դիարբեքիրին, Դիարբեքիրն էլ Կարոյին է վայել: Դիարբեքիրի կենտրոնը նախկինում միշտ եղել է ինքնություն և մշակույթ կրող: Հանրապետության առաջին տարիներին հատկապես այն պահպանել է իր յուրահատկությունը, սակայն 1915 թվականի Հհայոց ցեղասպանության ժամանակ և դրանից հետո տեղի ունեցած իրադարձությունները տակնուվրա են արել այն, ինչ իր վրա կրել է Դիարբեքիրը: Մինչև 1980-ականները հայկական ընտանիքները ապրում էին Սուր շրջանում: Անգամ իմ մանկության տարիներին հայերը շարունակում էին այնտեղ ապրել, սակայն 80-90-ական թվականներին ճնշումն ու բռնի պայմանները «վերջին հայերից» խլեց իրենց հայրենիքը: Սա ծայրահեղ ողբերգական և տրավմատիկ է: Հայերը Դիարբեքիրում հյուր չեն, բնիկներն են: Կարոն էլ Դիարբեքիրի համար օտար չէ։  Հավատում եմ, որ նրա և Դիարբեքիրի երիտասարդների միջև կստեղծվի լավ հաղորդակցություն։ Իրեն հաջողություն եմ մաղթում»,- հայտարարել է Դեմիրթաշը: