Նախնական քննարկումներ ենք սկսել գազի և էլեկտրաէներգիայի սակագների վերանայման համար. նախարար

Էներգետիկ ենթակառուցվածքների և բնական պաշարների նախարարությունում քննարկումներ են տեղի ունենում գազի և էլեկտրաէներգիայի սակագների իջեցման հնարավորությունների վերաբերյալ: Այս մասին խորհրդարանում լրագրողների հետ զրույցում ասաց Էներգետիկ ենթակառուցվածքների և բնական պաշարների նախարար Արթուր Գրիգորյանը:

«Մենք Հանրային ծառայությունները կարգավորող հանձնաժողովի հետ նախնական քննարկումներ ենք սկսել, թե հնարավոր բոլոր ճանապարհները, բոլոր վերլուծություններն անելու պարագայում արդյո՞ք հնարավոր կլինի էներգիայի սակագնի փոփոխություն անել»,- ասաց նա:

Նախարարը տեղեկացրեց, որ երկու օրվա ընթացքում քննարկումները կավարտվեն, և արդյունքների մասին կհայտարարվի: «Հիմա մենք հենց հաշվարկներն ենք անում, հաշվարկների արդյունքները երբ պարզ լինեն, կհրապարակենք»,- ասաց նա:

Իսկ թե ե՞րբ հնարավոր կլինի վերանայել սակագինը, Գրիգորյանն ասաց, որ էլեկտրաէներգիայի սակագինը վերանայվում է օրենքով սահմանված կարգով՝ 6 ամիսը մեկ անգամ: «Վերանայումը հնարավոր է օգոստոսից հետո, քանի որ վերջին վերանայումը տեղի է ունեցել փետրվարին»,- հայտնեց նա: