Նախատեսվում է Ռուսաստանից Հայաստան և Վրաստան «առևտրային միջանցքների» ստեղծում. վրացի պաշտոնյա

Մայիսի 24-ին Պրահայում Ռուսաստանի փոխարտգործնախարար Գրիգորի Կարասինի հետ  նախատեսված  բանակցությունների ընթացքում Վրաստանը և Ռուսաստանը կձևավորեն հատուկ աշխատանքային խումբ՝ «Մաքսային վարչարարության և ապրանքների առևտրի մոնիթորինգի մեխանիզմի մասին» համաձայնագրի իրականացման նպատակով: Համաձայնագիրը նախատեսում է Ռուսաստանից Աբխազիայով և Հարավային Օսիայով Վրաստան ու Հայաստան «առևտրային միջանցքների» ստեղծում: Այդ մասին Радио Свобода-ին տված հարցազրույցում ասել է Վրաստանի վարչապետի՝ Ռուսաստանի հետ հարաբերությունների կարգավորման հարցով հատուկ ներկայացուցիչ Զուրաբ Աբաշիձեն:

Ըստ նրա` տվյալ պայմանավորվածության ձեռք բերման հնարավորությունը հայտնվել է այն բանից հետո, երբ Ռուսաստանն օրերս շվեյցարական SGS ընկերության հետ ստորագրել է շվեյցարացի դիտորդների կողմից Աբխազիայով և Հարավային Օսիայով բեռների տեղափոխումը մոնիթորինգի ենթարկելու մասին հատուկ պայմանագիրը: