Պետք է մտածել ինչ-որ մի ժամանակաշրջանով կասեցնել արագաչափերի ու տեսախցիկների գործունեությունը. վարչապետ

Այսօր կառավարության նիստում, նախքան օրակարգին անցնելը, վարչապետ Նիկոլ Փաշինյանը դիմեց ոստիկանապետ Վալերի Օսիպյանին ու արդարադատության նախարար Արտակ Զեյնալյանին երթևեկությանը հետևող արագաչափերի և տեսախցիկների գործունեության վերաբերյալ:

«Կարծում եմ, որ հսկայական տույժ-տուգանքներ կան կուտակված: Ենթադրում եմ` մարդիկ չեն վճարել դրա հնարավորությունը չունենալու պատճառով: Մենք մեխանիզմներ պետք է մտածենք այդ պարտքը ներելու ուղղությամբ: Պետք է մտածել արագաչափերի և տեսախցիկների գործունեության հետագա արդյունավետության մասին: Կարծում եմ` եթե, իհարկե, կա նման օրենսդրական հնարավորություն, եթե չկա` մտածել այդ օրենսդրական հնարավորության ուղղությամբ, ինչ-որ մի ժամանակաշրջանով դադարեցնել կամ կասեցնել արագաչափերի ու տեսախցիկների գործունեությունը: Պետք է շատ արագ վերացնել այն պրակտիկան, երբ հոծ գծեր շոշափելու համար մարդկանց տուգանում են: Մարդկանց անընդհատ տուգանելու մոլուցքը պետք է շատ արագ վերացնել»,- ասաց վարչապետը` հանձնարարելով արդարադատության նախարարին` ոստիկանության հետ համատեղ աշխատել և առաջարկություններ ներկայացնել: