Տեղական ինքնակառավարման մարմինն անկախ է. Տարոն Մարգարյանը մտադիր չէ հրաժարական տալ

 Քիչ առաջ քաղաքապետարանի դիմաց բողոքի ակցիա իրականացնող, մասնավորապես` քաղաքապետի հրաժարականը պահանջող  քաղաքացիների մոտ իջավ քաղաքապետ Տարոն Մարգարյանը: Նշենք, որ քաղաքապետարանի դիմաց էին հավաքվել քաղաքապետին սատարող մի խումբ քաղաքացիներ, որոնց էլ իր խոսքը ուղղեց Տարոն Մարգարյանը` նրանց շնորհակալություն հայտնելով:

«Շնորհակալ եմ, որ միշտ եղել եք մեր կողքին, որ միշտ հավատացե եք մեզ:  Շնորհակալ եմ, պաշտպանում եք ձեր քաղաքապետին, մենք միասին կառուցելու ենք մեր Երևան քաղաքը»,- ասաց Տարոն Մարգարյանը:

Ինչ վերաբերում է իր դեմ բողոքող քաղաքացիներին, Տարոն Մարգարյանը վստահեցրեց, որ մինչև հիմա չէր իջել բողոքողների մոտ, որովհետև աշխատանքային այցով այլ վարչական շրջանում էր գտնվում, և լսելով բողոքի ակցիայի մասին, շտապել է քաղաքապետարան:

« Հարգում եմ մեր երևանցիների խոսքը, մենք միշտ լսել ենք երևանցիներին և անպայման հաշվի ենք առնելու բոլոր խնդիրները: Մեր ծրագրերը, որոնք առաջիկա 5 տարվա համար նախատեսել ենք, իրականացնում ենք»,- ասաց նա:

Անդրադառնալով  իր  հրաժարականի պահանջին, քաղաքապետը նշեց, թե տեղական ինքնակառավարման մարմինն անկախ են:

«Ամբողջ աշխարհում ընդունված չէ, որ մի քաղաքական ուժ գա իշխանության եւ փորձի ճնշել տեղական ինքնակառավարման ընտրովի մարմիններին»,- նշեց Տարոն Մարգարյանը: