Մեկամսյա ժամկետում Սերժ Սարգսյանին կտրամադրվի բնակարան

Այսօր կառավարության նիստում ՀՀ արդարադատության նախարարի պաշտոնակատար Դավիթ Հարությունյանը ներկայացրեց կառավարության որոշման փոփոխություն: Նա նշեց, որ սույն թվականի մարտի 29-ին որոշում էր ընդունվել, որ Կոնդի թաղամասի առանձնատների տնտեսության հաշվեկշռում գտնվող որոշակի շինություն իր հողամասով տրամադրվում էր պաշտոնաթող նախագահ Սերժ Սարգսյանին: Սակայն 2018թ. ապրիլի 19-ի նիստում վարչապետ Սերժ Սարգսյանը հանձնարարեց, որ որոշման համապատասխան կետերը ճանաչվեն ուժը կորցրած` առաջարկելով, որ պաշտոնաթող երրորդ նախագահին տրամադրվի բնակարան հաջորդ կառավարության կողմից, երբ նա չի ղեկավարի կառավարությունը:

«Այսօր Սերժ Սարգսյանն այլևս չի ղեկավարում կառավարությունը: Մենք ներկայացնում ենք այս նախագիծը, առաջարկում այն ընդունել: Իսկ այն, որ պաշտոնաթող նախագահն օգտվում է սոցիալական երաշխիքից, դա նախատեսված է մեր օրենքով: Պետք է նշեց, որ նա վերջին պաշտոնաթող նախագահն է, ով օգտվում է այդ իրավունքից, որովհետև նման սոցիալական երաշխիքներ այլևս չեն տրվելու ՀՀ պաշտոնաթող նախագահներին»,- ասաց Դավիթ Հարությունյանը:

Փաշինյանն արձագանքեց. «Խնդիրը, կարծում եմ, պարզ է: Տեղի էր ունեցել կառավարական առանձնատներից մեկի սեփականաշնորհում, և հետագա իրադարձությունների արդյունքում անհրաժեշտություն է առաջացել որոշման այդ հատվածը չեղյալ հայտարարել և գտնել այլ լուծում, որը կապահովի օրենքով նախատեսված երաշխիքը»:

Վարչապետը հանձնարարեց իր աշխատակազմի նորանշանակ ղեկավարին` մեկամսյա ժամկետում առաջարկություն ներկայացնել Սերժ Սարգսյանին օրենքով սահմանված բնակարանի ապահովման երաշխիքների վերաբերյալ, այսինքն` մեկ ամսվա ընթացքում պետք է գտնել լուծում օրենքով սահմանված երաշխիքներն ապահովելու համար: