Փողը լիքն է, ծախսում են. Հայոց ցեղասպանության մասին` Էրդողանի լպիրշ հայտարարությունը

Թուրքիայի նախագահ Ռեջեփ Թայիփ Էրդողանը Հայոց ցեղասպանության մասին հերթական լպիրշ հայտարարությունն է արել:

Ըստ Haberturk-ի` նա  հայտարարել է, թե բոլոր նրանք, ովքեր «պնդումներ են առաջ քաշում ցեղասպանության մասին», թող համարձակություն ցուցաբերեն`  արխիվներն ուսումնասիրելու:

«Եթե այդքան համարձակություն ունեք, խնդրեմ: Մենք բացում ենք արխիվները: Եթե դու էլ ունես, դու էլ բաց արա: Բայց սրանք ոչինչ չեն անում, բացի աշխարհի աչքին Թուրքիային սևացնող գործունեություն ծավալելուց»,- ակնարկելով Հայ դատի գործունեությունը` ասել է Էրդողանը, ապա հավելել. «Փողն էլ լիքն է, ծախսում են: Սրանք Թուրքիային գցելու են իբր հանցավորի տեղ: Չեն հաջողելու, քանի որ մենք իրավացի ենք»:

Նշենք, որ սա առաջին անգամ չէ, որ Թուրքիայի նախագահը կոչ է անում պատմաբանների համատեղ հանձնախումբ ստեղծել և ուսումնասիրել «հայկական պնդումները»: