Դեղձուտցիները սպառնում են Ալիկ Սարգսյանին` չհեռանալ նրա տան մոտից` մինչև չմիանա շարժմանը

Հայտնել էինք, որ Արարատի մարզի Դեղձուտ համայնքի բնակիչներն առավոտյան ժամը 9-ից շրջափակել են գյուղապետարանի շենքը, փակ է նաև դպրոցը: Հայտարարել են դասադուլ և գործադուլ: Նրանք հայտարարել էին նաև, որ շրջափակելու են ՀՀԿ-ական պատգամավոր Ալիկ Սարգսյանի տունը՝ պահանջելու բացատրություն, թե ինչու չի քվեարկել ժողովրդի թեկնածուի օգտին:

Բնակիչները «ՀՀԿ, հեռացիր», «Կանաչուտ, միացիր» կոչերով շարժվեցին դեպի Կանաչուտ համայնք, որտեղ էլ բնակվում է պատգամավորը: Կանաչուտում բնակիչներին դիմավորեցին Ալիկ Սարգսյանի կողմնակիցները, ովքեր կազմակերպեցին հրմշտոց և փորձում էին թույլ չտալ ցուցարարներին` մոտենալ Սարգսյանի տանը: Նրանց չհաջողվեց կանգնեցնել ցուցարարներին:

Ցուցարարներն այս պահին Սարգսյանի տան մոտ են և հայտարարում են` եթե պետք լինի, մի քանի օր կմնան այդտեղ, նստացույց կանեն այնքան ժամանակ, մինչև Սարգսյանը չմիանա ժողովրդին:

Նշենք, որ հարակից գյուղերի բնակիչներն էլ են այս պահին միացել դեղձուտցիներին: