Հայտնաբերվել է Պոլսի հայկական եկեղեցու վրա հարձակում կատարած անձը

Պոլսի Քադըքյոյ թաղամասում գտնվող հայկական Սուրբ Թագավոր եկեղեցու վրա հարձակում կատարած անձը հայտնաբերվել և բերման է ենթարկվել։

Ըստ Ermenihaber-ի՝ Ստամբուլի իրավապահ մարմինները հետքաննություն էին սկսել ապրիլի 30-ին Սուրբ Թագավոր եկեղեցու մուտքը աղբի կույտով փակած և պարիսպի վրա ռասիստական «Այս հայրենիքը մերն է» արտահայտությունը գրած անձանց հայտնաբերելու ուղղությամբ։ Հարձակումն իրականացրած անձի ինքնությունը պարզվել է տարածքը տեսահսկող սարքերի տեսագրությունների ուսումնասիրությունից։

Բերման ենթարկված անձը ոստիկանությանը տված ցուցմունքում նշել է, որ գործել է միայնակ, իսկ դրդապատճառը եղել է եկեղեցու սպասավորների վատ վերաբերմունքն իր նկատմամբ։

Նշվում է, որ կասկածյալ Ս․Կ․-ն հոգեկան խնդիրներ ունի և նախկինում 2 անգամ ինքնասպանության փորձ է արել։