Թուրքիայի Սբ Գևորգ հայկական պատմական եկեղեցում Զատիկը նշող միակ հայը

Մի ժամանակ մոտ 50 հայ ընտանիք ունեցող Թուրքիայի Մարդին նահանգի Դերիք շրջանում մնացել է 3 հայ, որոնցից մեկը՝ Զեքերիա Սաբունջուն, Սբ Զատկի առիթով այցելել է տեղի հայկական Սբ Գևորգ եկեղեցի:

Թուրքական Hurriyet-ի հաղորդմամբ՝ 37 տարի առաջ Կ.Պոլիս տեղափոխված տղամարդը 5 տարի է՝ միայնակ վերադարձել է հայրենի տուն: Նա Սբ Զատկից մեկ օր առաջ այցելել է Սուրբ Գևորգ հայկական եկեղեցի, աղոթել և մոմ վառել:

Կայքը ուշադրության է արժանացնում այն փաստը, որ մինչև «1915 թվականի դեպքերը» Դերիքում եղել են բազմաթիվ հայեր, սակայն այժմ այնտեղ մնացել է միայն երեք հայ՝ Նայիֆ և Յուրշալին Դեմիրները, ինչպես նաև Սաբունջուն:

«Այս եկեղեցին կառուցվել է 1650 թվականին: Մինչև 1915-ը այստեղ ունեցել ենք 7 հայկական եկեղեցի և երեք դպրոց: Այդ դպրոցներում ուսուցանվում էր օսմաներեն, հայերեն և ֆրանսերեն լեզուներով: Այդ տարիներին Դերիքում ապրում էր մոտ 1750 հայ, իսկ հիմա մնացել ենք երեքով: Երբ տեղափոխվեցի Պոլիս, սկսեցի աշխատել պապական գործով՝ օճառի արտադրությամբ: Վաղվա Զատկի տոնն այսօր եմ նշում, քանի որ պետք է վերադառնալ Պոլիս՝ ընտանիքիս հետ նշելու»,- պատմել է Զեքերիա Սաբունջուն: