Նաիրա Զոհրաբյանը գրազ առաջարկեց առողջապահության նախարարությանը

Դեղերը դեղատոմսերով գնելու վերաբերյալ խորհրդարանական լսումների ժամանակ ԱԺ «Ծառուկյան» խմբակցության պատգամավոր Նաիրա Զոհրաբյանը ելույթում նախ անընդունելի համարեց, որ լսումներին ներկա չէ առողջապահության նախարարը:

«Ոլորտին վերաբերող լրջագույն քննարկում է, ես սա արհամարհանք եմ ընդունում խորհրդարանի նկատմամբ: Ապրիլի 9-ից, երբ նոր Սահմանադրությունը լիարժեք կմտնի ուժի մեջ, «Ծառուկյան» խմբակցությունը կօգտվի այն դրույթի տված հնարավորությունից, որ հարցապնդման արդյունքում կարելի է բարձրացնել կառավարության առանձին անդամների հրաժարականի հարցը: Այն նախարարները, ովքեր իրենց պատվից ցածր են համարում գալ այստեղ, պատասխանել լրջագույն հարցերին, նմանօրինակ նախարարների հրաժարականի հարցը անպայման կքննարկենք և կբարձրաձայնենք»,- հայտարարեց նա:

Անդրադառնալով լսումների թեմային` պատգամավորն ընդգծեց, որ որևէ մեկը չի ասում, թե ոլորտը թող լինի բարձիթողի վիճակ, և դեղերի շրջանառությունը չհսկվի:

«Այո, հիվանդը չպիտի որոշի` ինքը հիվա՞նդ է, թե՞ չէ, չպիտի ինքն իրեն գնա և դեղատնից վերցնի դեղ, բայց, ինչպես միշտ, մենք գալիս ենք վերջից` էվոլյուցիոն ողջ փուլը չանցնելով»,- նշեց նա:

Զոհրաբյանը նաև քննադատեց Եվրամիությանը հղում անողներին: «Եվրոպական երկրներում կա ցիվիլ առողջապահական համակարգ, առողջապահական ապահովագրական համակարգ, այլ մեխանիզմներ են գործում: Երբ քաղաքացին գնում է դեղատուն` 200 դրամանոց դեղ գնելու, և նրան ասում են, որ պետք է 20 հազար դրամանոց հետազոտություն անցնի, այդ գումարը ոչ թե վճարում է պացիենտը, այլ առողջապահական ապահովագրությունը»,- ասաց նա և հավելեց, որ մենք, չունենալով առողջապահական ապահովագրություն, ունենալով բազմաթիվ խնդիրներ ոլորտում, որոնք պետք է մինչ այս լուծվեին, գալիս ենք վերջին կետին:

«Ասում ենք` ահա սա լավ է, սա միջազգային փորձ է: Մինչդեռ միջազգային փորձը առողջապահական ապահովագրական համակարգ ունենալն է, ունենալն է բժիշկներ, որոնք կարող են տառաճանաչ կերպով գրել դեղատոմս: Հիմա ես գրազ եմ առաջարկում առողջապահության նախարարությանը` միասին մտնենք, 10 բժշկից 8-ին ասենք, որ գրեն անալգինի քիմիական բանաձևը, վստահեցնում եմ ձեզ`10-ից 8-ը չի կարող գրել»,- հայտարարեց նա:

Զոհրաբյանն ընդգծեց, որ նախ պետք է այս խնդիրները լուծել, հասկանալ` արդյո՞ք ունենք պրոֆեսիոնալ դեղագործներ համակարգում, ունե՞նք այնպիսի բժիշկներ, որոնք կարող են գրագետ ախտորոշել և գրել դեղատոմս:

«Ես կասկած ունեմ, որ սրանով մենք դեղի մաֆիայի համար կանաչ ճանապարհ ենք բացել, որովհետև գաղտնիք չէ, որ ունենք բազմաթիվ դեմքեր, ովքեր դեղ են ներկրում, հիվանդանոցներ ունեն, դեղատներ` իրենց հիվանդանոցներում, և հիվանդներին ուղղորդելու են այն դեղատները, որտեղ իրենց հիվանդանոցին պատկանող բժիշկը գրելու է այն դեղի անունը, որ տվյալ օլիգարխը ներկրում է անձամբ: Ո՞վ չի հասկանում` ինչ մոնոպոլիայի է տանելու այս համակարգը»,- շեշտեց նա:

Պատգամավորը խոսքն ավարտեց այսպես. «Ասում են` վերջին շրջանում առողջապահությունը մեծ քայլերով աշխարհում զարգանում է, իմ տպավորությամբ` թռիչքաձև անցել է Հայաստանի վրայով»: