Էրդողանի համոզմամբ՝ թուրքական պետականության պատմության մեջ երբեք չեն եղել օտար հողերի գրավման փաստեր

Թուրքիայի նախագահ Ռեջեփ Թայիփ Էրդողանը հայտարարել է, թե Թուրքիան իբր հակաահաբեկչական գործողություններ է իրականացնում Իրաքի Սինջար շրջանում:

Ըստ Reuters-ի՝ նա հայտարարել է, որ այնտեղ գործողություն սկսելու մասին իրենք հայտնել են ավելի վաղ, իսկ այժմ արդեն սկսվել են այդ գործողությունները:

Միջանկյալ նշենք, որ Թուրքիան ահաբեկչական կազմակերպություն է համարում Քուրդիստանի բանվորական կուսակցությանը, որի դեմ գործողություններ իրականացնում է ոչ միայն Թուրքիայի տարածքում, այլ նաև երկրից դուրս:

Էրդողանի խոսքով՝ Թուրքիայի սկսած գործողությունները կրում են զուտ «հակաահաբեկչական» բնույթ:

«Թուրքական պետականության պատմության մեջ երբեք չեն եղել օկուպացիայի և օտար հողերի գրավման փաստեր, ինչը չես ասի Արևմուտքի երկրների մասին»,- պնդել է նա: