Ճվճվ Արոյի որդու գործով կդիմեն Իրանի դատական մարմիններին. լուսանկարներ

Երևանի ընդհանուր իրավասության դատարանում այսօր շարունակվեց Ճվճվ Արոյի կրտսեր որդու՝ քրեական պատմություններով հայտնի Սերժ Վարդանյանի մասնակցությամբ դեռևս 2014-ին տեղի ունեցած խուլիգանության գործով հերթական դատական նիստը: Հիշեցնենք, որ նախորդ դատական նիստում Վարդանյանը հայտարարել էր, որ հրաժարվում է իր պաշտպան Մանվել Գրիգորյանի ծառայություններից, և որ իր շահերն այսուհետ ներկայացնելու է փաստաբան Սամվել Ջաղինյանը: Սակայն այսօրվա դատական նիստում պարզ դարձավ, որ Վարդանյանը փոխել է իր դիրքորոշումը և չի հրաժարվում պաշտպանից:

Նշենք, որ Սերժ Վարդանյանը ներկայումս կալանքի տակ է խուլիգանության և կողոպուտի դեպքերով հարուցված քրեական գործերով: Կողոպուտի դեպքը տեղի է ունեցել 2017թ. սեպտեմբերի 12-ին:

Այսօր պաշտպանական կողմի միջնորդությամբ դատարան էր հրավիրվել հայտնի փորձագետ, Երևանի դատաբժշկական գիտագործական կենտրոնի բարդ դատաբժշկական փորձաքննությունների բաժնի վարիչ, բժշկական գիտությունների թեկնածու Գագիկ Հարությունյանը:

Փորձագետը դատարան էր հրավիրվել Սերժ Վարդանյանի մասնակցությամբ կատարված խուլիգանության գործով իր կողմից դեռևս 4 տարի առաջ տրված եզրակացության վերաբերյալ պարզաբանումներ տալու: Համաձայն մեղադրական եզրակացության՝ Սերժ Վարդանյանը Ռոբերտ Հայրապետյանի հետ «Լադա Պրիորա» մակնիշի ավտոմեքենայով Երևան քաղաքի Սարյան փողոցով երթևեկելու ընթացքում դիտավորությամբ կոպիտ կերպով խախտել է հասարակական կարգը, որն արտահայտվել է հասարակության նկատմամբ բացահայտ անհարգալից վերաբերմունքով, այդ թվում` Շանթ Մագարյանի նկատմամբ բռնություն գործադրելով:

Նշենք, որ Շանթ Մագարյանին փորձաքննության ենթարկելիս նրա մարմնին հայտնաբերվել է միայն մեկ վնասվածք` աջ նախաբազկի շրջանում` արյունանզեղման տեսքով: Գագիկ Հարությունյանն այսօր դատարանում պարզաբանեց, որ տուժողը վնասվածքը չէր կարող ստանալ ձեռքով սեղմելու հետևանքով, այդ վնասվածքը կարող էր առաջանալ որևէ բութ առարկայի ներգործությամբ:

Գործով ամբաստանյալ Սերժ Վարդանյանի պաշտպան Մանվել Գրիգորյանը Գագիկ Հարությունյանից հետաքրքրվեց, թե հնարավո՞ր էր` տուժողին քարշ տալու արդյունքում նրա մարմնի վրա միայն մեկ վնասվածք հայտնաբերվեր, և արդյո՞ք կարող էր համեմատաբար թեթև քաշ ունեցող Ռոբերտ Հովհաննիսյանը մեքենայի ընթացքի ժամանակ ձեռքով քարշ տալ 80-100 կգ քաշով Մագարյանին: Դատավոր Գագիկ Պողոսյանն էլ իր հերթին հետաքրքրվեց, թե հնարավո՞ր էր, տուժածին պահելով, քարշ տալ և միայն մեկ վնասվածք պատճառել:

Գագիկ Հարությունյանը պատասխանեց, որ եթե տուժողին պահեին, նա առնվազն նախաբազկի կոտրվածքներ կստանար, իսկ չմարզված մարդը մի ձեռքով չէր կարող պահել 80-100 կգ քաշով անձին և մեքենայի ընթացքի ժամանակ քարշ տալ նրան: Նշենք, որ, համաձայն տուժողի ցուցմունքի, մեքենայի մեջ գտնվող անձինք իրեն մոտ 40 մ քարշ են տվել փողոցով:

Այսօրվա նիստում մեղադրող դատախազ Տիգրան Ենոքյանը միջնորդեց դատարանին` տուժողին ծանուցելու վերաբերյալ համապատասխան միջնորդություն ուղարկել դատախազություն, ինչից հետո իրենք կկարողանան դիմել Իրանի Իսլամական Հանրապետության դատական մարմիններին, որպեսզի ապահովեն Մագարյանի ներկայությունը դատաքննությանը:

Նախագահող դատավոր Գագիկ Պողոսյանը նշեց, որ նախկինում փորձել են տուժողին ծանուցել, սակայն նա հրաժարվել է ներկայանալ, բացի այդ` Մագարյանը դեպքից հետո առնվազն մեկ անգամ եղել է Հայաստանում և հնարավորություն ունեցել մասնակցելու դատական նիստին, սակայն չի ներկայացել:

Այնուամենայնիվ, դատարանը բավարարեց մեղադրողի միջնորդությունը` միևնույն ժամանակ հնարավոր համարելով հեռակապի միջոցով տուժողի հարցաքննությունը:

Հիշեցնենք, որ ներկայումս կալանքի տակ է նաև Սերժ Վարդանյանի ավագ եղբայրը՝ Սարգիս Վարդանյանը: Նա մեղադրվում է ճանապարհային երթեևեկության կանոնները խախտելու և ճանապարհատրանսպորտային պատահարի վայրը լքելու մեջ: Նրա մասնակցությամբ վթարը տեղի էր ունեցել 2018-ի հունվարի 8-ին: Վթարի հետևանքով զոհվել են ծառայության մեջ գտնվող երկու` ՃՈ աշխատակիցներ:

Նշենք, որ Վարդանյան եղբայրները նախկինումս ևս հայտնվել են աղմկահարույց պատմությունների կենտրոնում: