Ադրբեջանն ընտրությունները մոտեցրել է Հայաստանի ընտրություններին. Коммерсантъ

Ռուսական Коммерсантъ թերթն  անդրադարձել է Ադրբեջանի նախագահ Իլհամ Ալիևի` երկրում ապրիլի 11-ին արտահերթ նախագահական ընրություններ անցկացնելու որոշմանը: Թերթը նշում է, որ ապրիլին նաև հարևան Հայաստանում պետք է որոշվի` ով կդառնա երկրի վարչապետ:

«Թերթի զրուցակիցները բացատրում են Ալիևի որոշումը ներքին, ոչ թե արտաքին պատճառներով, սակայն հիմնական ինտրիգն այն է` ինչպե՞ս Բաքվում և Երևանում քաղաքական ակտիվությունը կազդի ԼՂ հակամարտության կարգավորման վրա»,- գրում է թերթը:

Ադրբեջանի նախագահի հասարակական-քաղաքական հարցերով օգնական Ալի Հասանովը տվյալ որոշումը բացատրել է այն բանով, որ, մայիսից սկսած, երկրում անցկացվելու են տեղական և միջազգային մակարդակի բազմաթիվ կարևոր միջոցառումներ, որոնց մի մասը համընկնում է ընտրությունների անցկացման հետ:

Թերթի հետ զրույցում ադրբեջանական խորհրդարանի պատգամավոր Արազ Ալիզադեն նույնպես արդարացրել է գարնանն ընտրությունների անցկացումը` նշելով, թե եթե ընտրությունները կայանան աշնանը, ապա նախընտրական արշավը կմեկնարկի ամռանը, մարդիկ պետք է մասնակցեն հանրահավաքների, ինչի հետևանքով գյուղատնտեսությունը կտուժի:

Թերթը զրուցել է նաև հայ քաղտեխնոլոգ Վիգեն Հակոբյանի հետ, ով կարծիք է հայտնել, որ տարվա առաջին կեսին երկու երկրներում ընտրությունների անցկացումը կարող է կողմերին հնարավորություն տալ «ԼՂ  հակամարտության վերաբերյալ միջանկյալ որոշում կայացնել, որը պահանջում է ավելի շատ լեգիտիմություն»: Մինչդեռ Հայաստանի իշխող շրջանակներից` լրատվամիջոցի զրուցակիցը այդքան լավատեսական չէ տրամադրված և հայտնել է, որ հակված է Ադրբեջանից սպասել Լեռնային Ղարաբաղում իրավիճակի սրման:

Միևնույն ժամանակ թերթը նշում է, որ Բաքվում իր զրուցակիցները միաձայն պնդել են, որ ընտրությունների տեղափոխումը ոչ մի կապ չունի Հայաստանի և ԼՂ հակամարտության հետ: