Էրդողանները դրամական փոխհատուցում են պահանջում Ցեղասպանության թեմայով իրենց հետ կոնֆլիկտ ունեցած ընդդիմադիր գործչից

Թուրքիայի նախագահ Ռեջեփ Թայիփ էրդողանը 700.000 լիրա (մոտ 190.000 դոլար) դրամական փոխհատուցման պահանջով դատի է տվել ընդդիմադիր Ժողովրդահանրապետական կուսակցության գործիչ Ջանան Քաֆթանջըօղլուին՝ իրեն վիրավորելու մեղադրանքով:

Ըստ Hurriyet-ի՝ Էրդողանը Ստամբուլի գլխավոր շտաբի նորանշանակ ղեկավար Քաֆթանջըօղլուի դեմ ներկայացրել է 14 առանձին մեղադրանք, որոնցից մեկը վերաբերում է Էրդողանի մոր մասին վիրավորանք պարունակող թվիթերյան գրառմանը: Էրդողանին մոտ կանգնած աղբյուրները հայտնել են, որ նա վիրավորական յուրաքանչյուր գրառման համար պահանջել է 5000 լիրա:

Ըստ կայքի ՝ Էրդողանի որդին՝ Բիլալ Էրդողանը, իր հերթին երկու դատական հայց է ներկայացրել Քաֆթանջըօղլուի դեմ: Նա Քաֆթանջըօղլուի երկու գրառումների համար պահանջում է 100.000 լիրա (մոտ 30.000 դոլար):

Հիշեցնենք, որ Էրդողանը քննադատել էր Քաֆթանջըօղլուին սոցցանցերից մեկում Հայոց ցեղասպանության մասին գրառում կատարելու համար: «Նա, կիրառելով «Հայոց ցեղասպանություն» եզրույթը, նվաստացրել  է մեր ազգին ու մեր պատմությունը: Տեսեք, թե ում ձեռքում է մնացել Քեմալ Աթաթուրքի կուսակցությունը»,- ասել էր նա: