Ճոճկանի մանկապարտեզը դեռ փակ է. երեխաներն ապաքինվում են

Օրերս Լոռու մարզի Ճոճկան համայնքի մանկապարտեզում արձանագրվել էր աղիքային վարակիչ հիվանդությունների բռնկում, որի արդյունքում 5 երեխա տեղափոխվել էր Ալավերդու բժշկական կենտրոն, իսկ 3 երեխա ամբուլատոր պայմաններում էր բուժում ստանում: Հիվանդներից 4-ը հայտնաբերվել են ՀՀ առողջապահության նախարարության մասնագետների կողմից իրականացված բակային համայցերի ընթացքում, և նրանց առողջական վիճակը գնահատվել է միջին ու թեթև:

Ճոճկանի գյուղապետը՝ Արկադի Թամազյանը, Yerkir.am-ի հետ զրույցում նշեց, որ առողջապահության նախարարությունից այցելել են մանկապարտեզ, ինչպես նաև տնայցեր են եղել ու կանխարգելիչ միջոցառումներ:

«Մանկապարտեզը հիմա փակ է, մի քանի օր դեռ փակ կմնա, որպեսզի վարակը չտարածվի: Բացի այդ՝ դեռ հետազոտություններ են իրականացվում՝ վարակի աղբյուրը հայտնաբերելու համար: Վիրուսը հայտնաբերվել է սննդի մեջ՝ պանրի և մակարոնով փլավի, այսինքն՝ աշխատակիցներից մեկի միջոցով է վիրուսը մանկապարտեզ թափանցել, բայց թե ով է վիրուսը ներս բերել, դեռ պարզ չէ»,-ասաց Թամազյանը: Ըստ նրա՝ սա մանկապարտեզում նման առաջին դեպքն է:

Ալավերդու բժշկական կենտրոնի բժիշկներից Մանուշակ Աբրահամյանն էլ մեզ հետ զրույցում նշեց, որ այսօր հիվանդանոցից դուրս են գրվել վերջին երկու հիվանդ երեխաները: Նրա հավաստմամբ՝ հիվանդացության նոր դեպքեր չեն հայտնաբերվել:

Նշենք նաև, որ առողջապահության նախարարության Հիվանդությունների վերահսկման և կանխարգելման ազգային կենտրոնի հետազոտությունների արդյունքում հիվանդների, նրանց հետ շփված երեխաների և մանկապարտեզի աշխատակիցների մոտ հայտնաբերվել է շիգելլա (մանրէային դիզենտերիայի հարուցիչ) և ռոտավիրուս: Հիվանդությունների առաջացման հավանական պատճառը մանկապարտեզում սննդամթերքի երկրորդային ախտոտումն է, որի համար աղբյուր են հանդիսացել մանկապարտեզի այն աշխատակիցները, ում մոտ լաբորատոր հետազոտության արդյունքում հայտնաբերվել է շիգելլոզ և ռոտավիրուսային վարակ: