Քողարկելով` վերադառնում ենք արտակարգ ռեժիմի վիճակին. Նիկոլ Փաշինյան

ԱԺ-ում քննարկվում է «Հավաքների ազատության մասին» Հայաստանի Հանրապետության օրենքում փոփոխություններ եւ լրացում կատարելու մասին ՀՀ օրենքի նախագիծը: ՀՀ արդարադատության նախարարի առաջին տեղակալ Արթուր Հովհաննիսյանի խոսքով` փոփոխությունը պայմանավորված է նոր` փոփոխված Սահմանդրությամբ, որում ավելի հստակ են արտացոլված որոշ դրույթներ: Օրինակ` եթե գործող օրենսգրքով նախատեսված է, որ Սահմանադրական դատարանի անդամները հավաքներին մասնակցելիս պետք է քաղաքական չեզոքություն եւ զսպվածություն ցուցաբերեն, ապա առաջարկվող փոփոխություններով կոնկրետացվել է` խոսքը վերաբերում է միայն ՍԴ դատավորներին:

ԱԺ «Ելք» խմբակցության պատգամավոր Էդմոն Մարուքյանի խոսքով` գործող օրենսգիրքը չի հակասում փոփոխված Սահմանադրությանը, և  այն փոխելու կարիք չկա: Նա ԱԺ պետական-իրավական և մարդու իրավունքների պաշտպանության մշտական հանձնաժողովի նախագահ Հրայր Թովմասյանից հետաքրքրվեց` արդյո՞ք գործող ձևակերպումը հակասում է նոր Սահմանադրության ձևակերպմանը:

Ի պատասխան` Հրայր Թովմասյանն ասաց, որ չի հակասում:

«Եթե չի հակասում, ինչո՞ւ ենք ընկել այդ ձևակերպման հետևից, որ հետևողական կերպով դա փոխենք, որպեսզի բանավեճն էլ չլինի, մենք էլ կողմ քվեարկենք»,- արձագանքեց Էդմոն Մարուքյանը:

ԱԺ պատգամավոր Նիկոլ Փաշինյանն էլ նշեց. «Գործ ունենք այն դեպքի հետ, որ Սահմանադրության անվան տակ ինչ կարողանում, սղղացնում եք: Ասում եք` տեխնիկական փոփոխություն է, բայց մի նախադասության մեջ մի ամբողջ փիլիսոփայություն է փոխվում, այսինքն` մենք վերադառնում ենք այն իրավիճակին, որ թաքուն, քողարկելու մեթոդներով վերադառնում ենք 2008թ. արտակարգ ռեժիմի ընթացքում եղած օրենքի վիճակին»: