Եթե մոռանում են ժողովուրդների ինքնորոշման իրավունքի մասին, թող մեղր ուտեն. Շարմազանովը` հարևան երկրների ԱԳ նախարարներին

Երեկ Բաքվում կայացել է Ադրբեջանի, Վրաստանի և Թուրքիայի ԱԳ նախարարների հանդիպումը:

Թուրքիայի արտգործնախարար Մևլութ Չավուշօղլուն  հանդիպումից հետո հայտարարել է. «Երեք երկրներն աջակցում են միջազգային իրավունքի հիմք հանդիսացող՝ տարածքային անձեռնմխելիության սկզբունքին»: Իր հերթին Վրաստանի ԱԳ նախարար Միխեիլ Ջանելիձեն ընդգծել է` իրենք` երեք հարևաններով, միջազգային ասպարեզում բավական արդյունավետ են համագործակցում, աջակցում են միմյանց տարածքային ամբողջականությանն ու ինքնիշխանությանը:

Այս առնչությամբ Yerkir.am-ի հետ զրույցում ԱԺ փոխնախագահ Էդուարդ Շարմազանովը նշեց, որ Չավուշօղլուն իր հայտարարության մեջ, որ արել է երեք երկրների անունից, մոռացել է  մեկ շատ կարևոր սկզբունք` ազգերի ինքնորոշման իրավունքը:

«Եթե նա խոսում է խաղաղ կարգավորման և տարածքային ամբողջականության մասին, հարկ կա նրա հիշողությունը թարմացնելու. եթե մոռացել է, կարող ենք հիշեցնել, որ խնդիրը պետք է լուծվի երեք հայտնի սկզբունքների հիման վրա, որոնցում ամենակարևորն ու առանցքայինը Արցախի ժողովրդի ինքնորոշման իրավունքն է»,- շեշտեց նա:

Շարմազանովն ընդգծեց, որ, առանց Արցախի ժողովրդի ինքնորոշման իրավունքի իրացման, ոչ մի խնդիր չի կարող լուծվել:

Ինչ վերաբերում է  տարածքային ամբողջականությանը, ապա, ըստ ԱԺ փոխխոսնակի, այստեղ այլ ասելիք չկա, քան իրականությունը` Արցախը երբեք` ոչ մի ժամ, ոչ մի րոպե, ոչ մի վայրկյան, անկախ Ադրբեջանի կազմում չի եղել: «Երբ ադրբեջանցիները խոսում են տարածքային ամբողջականության մասին, դա Արցախի հետ ոչ մի կապ չունի»,- ընդգծեց նա:

Մեր դիտարկմանը` Վրաստանի արտգործնախարար Միխեիլ Ջանելիձեն էլ է ճանաչում, այսպես ասած, Ադրբեջանի տարածքային ամբողջականությունը, Շարմազանովն արձագանքեց. «Անկախ նրանից` ով է ասում, ով չի ասում, ես ասում եմ, որ նրանք, ովքեր խոսում են խաղաղ կարգավորման ու տարածքային ամբողջականության մասին, բայց մոռանում են ինքնորոշման իրավունքի մասին, կա'մ թող մեղր ուտեն, կա'մ էլ մենք ստիպված պետք է հիշեցնենք` իրենք ուզեն, թե չուզեն խնդրի հիմքը ինքնորոշման իրավունքն է: Արցախը 26-ամյա անկախ պետություն է: Չավուշօղլուն կուզի ընկերների հետ տեսնել դա,  չի ուզի տեսնել, դա նրանց խնդիրն է»:

Շարմազանովը ևս մեկ անգամ հիշեցրեց, որ Արցախն անկախ է: «Արցախի անկախությունն այլընտրանք չունի, և Արցախի միջազգային ճանաչումը ժամանակի հարց է»,- շեշտեց նա: