Թուրքիան հսկայական քայլերով հեռանում է Եվրոպայից. Եվրահանձնաժողովի նախագահ

Եվրամիության (ԵՄ) անդամ երկրների արտգործանախարարների նիստում ելույթով հանդես եկած` Եվրահանձնաժողովի նախագահ Ժան Կլոդ Յունկերը խոսել է Թուրքիայի՝ եվրաանդամակցության շուրջ բանակցությունների մասին:  Ըստ թուրքական  «Hurriyet» թերթի կայքի՝ Յունկերն ասել է, որ այժմ Թուրքիայի և ԵՄ-ի միջև բանակցությունները դադարեցված են ստեղծված իրավիճակի պատճառով: 

Ըստ Ermenihaber-ի՝ նա ավելացրել է, որ պաշտոնական Անկարան, մասնավորապես` Էրդողանը, ԵՄ-ի և Թուրքիայի միջև անհաջող բանակցությունների ընթացքը ցանկանում է բարդել ԵՄ-ի վրա:

Յունկերի  խոսքերով՝ Եվրոպան  իրեն այնպես պետք է  պահի, որ ցույց տա, որ անհաջող բանակցությունների մեղավորը ոչ թե եվրոպական կողմն է, այլ հենց Էրդողանը: Նշվել է, որ այժմ Թուրքիան «հսկայական քայլերով հեռանում է» Եվրոպայից: Յունկերը կարծիք է արտահայտել, որ Էրդողանն այժմ ակնկալում է, որ ԵՄ-ն կհայտարարի Թուրքիայի հետ եվրաանդամակցության շուրջ բանակցությունների ավարտի մասին: