Հանձնարարական նվազ նշանակության հարկային իրավախախտումների համար նախազգուշացում սահմանելու վերաբերյալ

Այսօր կառավարության նիստում վարչապետ Կարեն Կարապետյանը հանձնարարական տվեց նվազ նշանակության հարկային իրավախախտումների համար նախազգուշացման սահմանման վերաբերյալ։ Նրա խոսքով՝ ՓՄՁ-ների հետ հանդիպումների ժամանակ վեր են հանվել նվազ նշանակության` հաճախակի հանդիպող իրավախախտումներ, որոնք վերաբերում են հարկային մարմիններին անհրաժեշտ փաստաթղթերը սահմանված ժամկետներում ներկայացնելու կամ թերի ներկայացնելու դեպքերին։

Նման իրավախախտումների դեպքում ներկայումս նախատեսված է տուգանքի նվազագույն և առավելագույն չափ, սակայն դրանց որոշման օրենսդրական հիմքերը բացակայում են, ինչը թույլ է տալիս կիրառող մարմնին ցուցաբերել հայեցողական մոտեցում։ Միաժամանակ, նման բնույթի խախտումները նվազ նշանակության են, և առաջին անգամ նման խախտում թույլ տվող տնտեսվարողների նկատմամբ կարող է կիրառվել զգուշացում, սակայն ներկայումս նման նախաձեռնությունը օրենսդրությամբ ամրագրված չէ։

Վարչապետը, ելնելով վերոնշյալից, հանձնարարեց տնտեսական զարգացման և ներդրումների նախարարին, ՊԵԿ նախագահին` մեկամսյա ժամկետում ուսումնասիրել և կառավարության աշխատակազմին ներկայացնել հարկային ոլորտում նվազ նշանակության իրավախախտումներ առաջին անգամ կատարելու դեպքում տնտեսվարողների նկատմամբ նախազգուշացում կիրառելու և տուգանքի չափի հստակեցման վերաբերյալ առաջարկություններ։