Հայտնի են վերջին օրերի հրդեհների հասցրած վնասները

Կառավարության այսօրվա նիստում, նախքան օրակարգի հարցերին անցնելը,  ԱԻՆ փոխնախարար Դավիթ Կարապետյանը, փոխվարչապետ Վաչե Գաբրիելյանի հորդորով, ներկայացրեց վերջին օրերի հրդեհների հասցրած վնասները:

Կարապետյանը նշեց, որ  օգոստոսի  10-ին Վայոց ձորի մարզի Արտավան համայնքի շրջակա անտառում բռնկված հրդեհի մարման աշխատանքներն ամբողջովին ավարտվել են: Ըստ նրա` Վայոց ձորում այրվել է շուրջ 15 կմ պարագծով խոտածածկ տարածք, որից 320 հեկտարը` անտառածածկ: Փորվել են բազմաշերտ խրամատներ՝ հրդեհի տարածումը բացառելու համար:

Կարապետյանը հայտնեց, որ Խոսրովի արգելոցի տարածքում օգոստոսի 12-ին բռնկված հրդեհի հիմնական օջախները մարվել են երեկ: «Մի քանի օր տևած հրդեհաշիջման աշխատանքներն անցել են չափազանց անբարենպաստ բնակլիմայական պայմաններում՝ լեռնային բարդ ռելիեֆ, տևական երաշտից չորացած խոտածածկ տարածքներ, հրդեհի արագ տարածմանը նպաստող քամիներ: Նախնական տվյալներով՝ Խոսրովի պետական արգելոցի սահմաններում այրվել է 16 կմ պարագծով բուսածածկ տարածք, որից 360 հեկտարը՝ անտառներ»,- ասաց նա:

Ըստ փոխնախարարի՝ համատեղ ջանքերով հաջողվել է կանխել հրդեհի առավել մեծ տարածումը: Նա նշեց, որ, հաշվի առնելով այն, որ մի կողմից նման խոշոր հրդեհներ Հայաստանում վաղուց չեն եղել, և հանրությունը բավարար չափով տեղեկացված չէ նման հրդեհների դեմ պայքարի դժվարությունների մասին, հանրության շրջանում ձևավորել էին սպասումներ, որ այս աղետը հնարավոր է հաշված րոպեների ու ժամերի ընթացքում չեզոքացնել: «Ավաղ, անտառային խոշոր հրդեհները լուրջ մարտահրավեր են անգամ աշխարհի ամենազարգացած պետությունների համար»,- ասաց Կարապետյանը:

Նրա խոսքով՝ այս դեպքերի վերաբերյալ ԱԻՆ-ում կիրականացվեն մանրակրկիտ ուսումնասիրություններ, կարվեն մասնագիտական հետևություններ՝ քաղված դասերը սերտելու, անտառային հրդեհներին արձագանքելու կարողությունները զարգացնելու նպատակով:

Վաչե Գաբրիելյանն ասաց, որ այս խնդիրը գտնվում է ՀՀ նախագահի ու վարչապետի անմիջական հսկողության ներքո, և երկու նախարարները` ԱԻ և բնապահպանության, այս պահին գտնվում են Վայոց ձորում: «Այս պահին, ըստ էության, խնդիրը լուծված է»,- ասաց փոխվարչապետը: