ԿԲ-ն 56 մլն դրամ ուղղել է ծառայողական փոխադրամիջոցների ձեռք բերմանը. Արթուր Ջավադյան

2016 թ. պետական բյուջեի կատարողականի քննարկման ժամանակ Կենտրոնական բանկի նախագահ Արթուր Ջավադյանը նշեց, որ Կենտրոնական բանկի վարչական ծախսերը կատարվել են 97 տոկոսով՝ կազմելով 6.8 մլրդ դրամ: Նրա խոսքով` վարչական հիմնական ծախսերը ներառում են ապարատի պահպանման ծախսերը, որոնց մեջ ներառված են աշխատակիցների աշխատավարձը, սոցապահովության, ներկայացուցչական, գործուղումների ծախսերը, ինչպես նաև ծառայողական փոխադրամիջոցների շահագործման ծախսերը:

Ջավադյանը նշեց, որ գործուղումների վրա տնտեսումներ են արել. աշխատակիցների գործուղումները կատարվել են 81 տոկոսով, 19 տոկոսը տնտեսել են:

«Ներկայացուցչական ծախսերը կատարվել են 84 տոկոսով՝ կազմելով 45 մլն դրամ: Ծառայողական փոխադրամիջոցների շահագործման ու սպասարկման ծախսերը կատարվել են պլանավորվածի 79 տոկոսով»,- ասաց նա:

Արթուր Ջավադյանը նշեց, որ նախատեսվել էր իրականացնել 32 մլրդ դրամի կապիտալ ներդրում, այն իրականացվել է 98 տոկոսով:

Ըստ Կենտրոնական բանկի նախագահի` 2016-ի ընթացքում ԿԲ-ի կողմից նախատեսված են եղել և կատարվել են հետևյալ ներդրումները՝ «Բնակարան երիտասարդներին» վարկային կազմակերպությանը` «Երիտասարդ ընտանիքներին մատչելի բնակարան», «Մատչելի բնակարան պետական ծառայողներին», «Մատչելի սպառողական վարկեր զինծառայողներին», «Մատչելի վարկեր ուսանողներին» և այլ հիփոթեքային ծրագրերի իրականացման նպատակով: 56 մլն դրամ էլ ԿԲ-ն ուղղել է ծառայողական փոխադրամիջոցների ձեռք բերմանը և կապիտալ վերանորոգման գծով կապիտալ ներդրումներին: