Դեմ քվեարկելն ինքնանպատակ չպետք է լինի. Վարդան Բոստանջյան

Կառավարության ծրագրին հավանություն է տվել գործադիր մարմինը, ծրագիր կներկայացվի Ազգային ժողով:

«Մինչ այս պահը թուղթը դեռ չի եկել»,- Yerkir.am-ի հետ զրույցում ասաց ԱԺ «Ծառուկյան» դաշինք խմբակցության պատգամավոր Վարդան Բոստանջյանը` պատասխանելով հարցին` արդյո՞ք խմբակցությունում քննարկել են կառավարության ծրագիրը:

Պատգամավորից փորձեցինք ճշտել` ինչպե՞ս է տրամադրված նրանց խմբակցությունը, արդյո՞ք որպես ընդդիմադիր ուժ դեմ կքվեարկեն: Բոստանջյանը պատասխանեց, որ դեմ քվեարկելը ինքնանպատակ չպետք է լինի: «5 տարով պատգամավոր ենք ընտրվել, եթե անուններս ընդդիմադիր է, ուրեմն մենք ամեն ինչին պետք է դե՞մ լինենք»,- ասաց նա, ապա հավելեց. «Մեկ էլ տեսար լավ, խոստումնալից ծրագիր եղավ` թվերով հագեցված: Անշնորհակալ գործ կլինի դեմ քվեարկելը»:

Ըստ Բոստանջյանի` խմբակցությունը դեռևս չի ձևավորել իր ամբողջական մոտեցումը, և ինքը հայտնում է իր սուբյեկտիվ կարծիքը: Նա նշեց նաև, որ առաջիկա մի քանի օրվա ընթացքում պարզ կլինի ամեն բան:

Բոստանջյանի խոսքով` եթե խմբակցությունը որոշի դեմ քվեարկել կառավարության ծրագրին, ինքը ևս դեմ կքվեարկի:
Մեր հարցին` եթե նույնիսկ համարի, որ ծրագիրը հավակնոտ է, դարձյա՞լ դեմ կքվեարկի, նա արձագանքեց. «Եթե որոշի, ես ի՞նչ պետք է անեմ:  Ես ոչ թե իմ կարծիքին դեմ կգնամ, այլ քաղաքական խմբակցությունն իր կարծիքը կհայտնի, կոլեգիալ որոշում կկայացնի, և կուսակցականներն էլ պետք է առաջնորդվեն այդ կոլեգիալ որոշմամբ: Ես գուցե մեկ հարցի վերաբերյալ ունենամ իմ մոտեցումը, բայց դա իրականության հետ կապ չունենա»: