Ամոթ է, այդ հարցը վաղուց է փակված. Նապոլեոն Ազիզյան

«Ծառուկյան» դաշինքի պատգամավորական մանդատների հետ կապված սկանդալից հետո կարծես ամեն ինչ հարթվել էր: Բայց մամուլում դարձյալ հրապարակումներ հայտնվեցին, թե Ծառուկյանն իր դեմ ըմբոստացածներից մի քանիսին պատգամավորական մանդատը թույլատրել է վերցնել ժամանակավորապես, և տարեվերջին նրանցից ոմանք, այդուհանդերձ, վայր կդնեն իրենց մանդատները, ու ԱԺ «Ծառուկյան» դաշինք խմբակցության կազմում կլինեն փոփոխություններ:

Yerkir.am-ի հետ զրույցում ԱԺ  «Ծառուկյան» դաշինք խմբակցության պատգամավոր Նապոլեոն Ազիզյանը հերքեց այս լուրերը: Նրա խոսքով` մամուլը պարապ է մնացել և նման բաներ է մոգոնում: «Ամոթ է, դեռ այդ հարցը քննարկո՞ւմ են»,- ասաց պատգամավորը:

Նա հավաստիացրեց, որ նման բան չկա, և որ այդ հարցը վաղուց փակված է, իսկ մնացածը մամուլի երևակայությունն է:

Հիշեցնենք, որ Նապոլեոն Ազիզյանը «Ծառուկյան» դաշինքի այն պատգամավորներից էր, որի անունից ինքնաբացարկի դիմում էր ներկայացվել ԿԸՀ, սակայն նա հետո վերականգնեց իր պատգամավորական մանդատը: