Նախարարության աշխատակիցների համար կազմակերպվելու է հեծանվային արշավ՝ դեպի մարզեր

Նախարարի տեղակալ Գաբրիել Ղազարյանը հանդիպել է մեր երկրում հեծանվային արշավներ կազմակերպող ֆրանսիական «Աքյոյ է Ղըլե» ընկերության ներկայացուցիչների հետ

ՀՀ սպորտի և երիտասարդության հարցերի նախարարի տեղակալ Գաբրիել Ղազարյանը հանդիպել է ֆրանսիական «Աքյոյ է Ղըլե» («Accueil et Relais») ընկերության ներկայացուցիչների հետ, որը մեր երկրում զբաղվում է բարեգործական և սոցիալական գործունեությամբ: Ընկերությունը 1998 թվականից Հայաստանի Հանրապետությունում կազմակերպում է հեծանվային արշավներ: 

Նախարարի տեղակալը, շնորհակալություն հայտնելով «Աքյոյ է Ղըլեի» ներկայացուցիչներին մեր երկրում հեծանվային սպորտի մասսայականացմանը աջակցելու համար, նշել է, որ ՀՀ սպորտի և երիտասարդության հարցերի նախարարությունը բազմաթիվ մարզական մասսայական միջոցառումներ է կազմակերպում, այդ թվում նաև՝ հեծանվային զբոսանքներ և արշավներ:

«Հիմա մեր նախարարության մասնագետներն աշխատում են Հայաստանում սպորտային տուրիզմի հայեցակարգի մշակման վրա: Վստահ եմ, որ ձեր փորձը կկարողանանք կիրառել մեր երկրում սպորտային և մասնավորապես՝ հեծանվային տուրիզմի զարգացման նպատակով»,- ասել է նախարարի տեղակալը: 

Նա նաև տեղեկացրել է, որ նախարարությունում մշակվում է մի ծրագիր, որի համաձայն ՀՀ սպորտի և երիտասարդության հարցերի նախարարության աշխատակիցների համար կազմակերպվելու է հեծանվային արշավ՝ դեպի հանրապետության տարբեր մարզեր: «Նախատեսում ենք նման արշավներ կազմակերպել նաև մյուս գերատեսչությունների աշխատակիցների մասնակցությամբ»,- նշել է Գ. Ղազարյանը: 

Ֆրանսիացի հյուրերը ուրախությամբ փաստել են, որ իրենք ականատեսն են Հայաստանում հեծանվային սպորտի տարեցտարի ավելի մասսայականացման: Նրանց խոսքերով՝ այսօր արդեն հնարավոր է հանրապետության տարբեր քաղաքների փողոցներում տեսնել հեծանվով շրջող բազմաթիվ անձանց: Հանդիպման ավարտին «Աքյոյ է Ղըլե» ընկերության ներկայացուցիչները շնորհակալություն են հայտնել նախարարի տեղակալին՝ ՀՀ սպորտի և երիտասարդության հարցերի նախարարության կողմից իրենց մարզական ձեռնարկումներին աջակցելու համար: