Կառավարությունն ավելի համարձակ թիրախներ կդնի իր առջև. Արծվիկ Մինասյան

Բնապահպանության նախարարի պաշտոնակատար Արծվիկ Մինասյանն այսօր լրագրողներին հայտնեց, որ կառավարությունը նախ միջանկյալ արդյունքների ամփոփում կանի, հետո միայն նոր մարտահրավերների մասին կխոսի: Նրա կարծիքով` կառավարությունն իր առջև ավելի համարձակ թիրախներ կդնի:

Հարցին` երկարաժամկե՞տ է լինելու կառավարության այս անգամվա ծրագիրը, Մինասյանն արձագանքեց. «Բնականաբար` այո, որովհետև կառավարությունն աշխատելու է ԱԺ-ն ձևավորած քաղաքական ուժերի հենքի վրա, և ԱԺ-ում ՀՀ նախագահի ուղերձը դառնալու է կառավարության ծրագրի հիմնական ուղղվածությունն ու թիրախը»:

Ինչ վերաբերում է այն բանին, որ հանրությունն իր մաշկի վրա չի զգում փոփոխությունները, ապա նա նշեց, որ սոցիոլոգիական հարցումները պետք է ցույց տան` արդյո՞ք հասարակությունը զգում է այդ փոփոխությունները: «Բայց սպասելիքներ դեպի լավը, դեպի փոփոխությունները կան: Առանձին տեղերում մենք ունենք դրական ցուցանիշներ: Վստահ եմ` եթե բարեփոխումները շարունակվեն, հասարակությունը նույնպես իր մաշկի վրա կզգա  և մասնակիցը կդառնա այդ բարեփոխումներին»,- հայտարարեց Մինասյանը: