Հանրապետություն փողոցում տղամարդու են դանակահարել

Երեկ դանակահարություն է տեղի ունեցել Երևանի Հանրապետություն փողոցում: Այս մասին Yerkir.am-ը տեղեկացավ ոստիկանությունից: Ժամը 21։15-ի սահմաններում «Աստղիկ» բժշկական կենտրոնից ոստիկանության Կենտրոնական բաժին ահազանգ է ստացվել, որ «ձախ գոտկային շրջանի կտրած-ծակած վերք» ախտորոշմամբ իրենց մոտ բուժօգնության է տեղափոխվել մի քաղաքացի։

Պարզվել է, որ տուժածը 1979 թ. ծնված Ա. Պ-ն է: Նա հայտնել է, որ վնասվածքը ստացել է «Վերնիսաժ» տոնավաճառի մոտակայքում՝ դանակահարվելու հետևանքով:

Դեպքի վայր մեկնած օպերատիվ խումբը պարզել է, որ նշված անձը վնասվածքը ստացել է նույն օրը` ժամը 19:30–ին, Հանրապետություն փողոցում վիճաբանության ժամանակ: Ձեռնարկված միջոցառումների շնորհիվ պազվել է հանցագործությունը կատարած անձի ինքնությունը: Ձեռնարկվում են միջոցառումներ տվյալ անձին և հանցագործության գործիք դանակը հայտնաբերելու ուղղությամբ:

Դեպքի կապակցությամբ նշանակվել է դատաբժշկական փորձաքննություն, կատարվում է փորձաքննություն: